Ram tana chawlh (international break) neih hmaa an match hnuhnung ber atan vawiin chawhnu hian Manchester United chuan Premier League inkhelah Aston Villa chu Old Trafford-ah an mikhual dawn ta a ni. Head coach Michael Carrick chuan sawi nep deuh ṭhin mah se, United lamin vawiinah hnehna an chang a nih chuan karkhat leh a chanve aia rei chawlh an neih hnu thleng pawhin a hna hi a chelh zui zel theih phah ngei a rinawm.
Kar liam taa Chelsea an hmachhawn ṭuma hnawhchhuah (red card) a nih avangin centre-back Lisandro Martinez chu a inlan thei dawn lo a. Premier League match hnuhnung bera a hmunruak luah tur hian Leny Yoro a rawn inlan a rinawm hle. Hei hian Diogo Dalot chu a khelh tlangnelna leh nuam a tih zawkna right-back lama kir leh theihna kawng a hawnsak dawn a ni.
Tlarhnung veilamah Patrick Dorgu chu training-ah a kir leh tawh na a, press conference-a Carrick-a thusawi aṭanga thlirin bul a ṭan nghal chu a la rinawm loh hle. Luke Shaw pawh hliam vangin a la chawl reng bawk a, chuvangin United tlarhnung buaina chinfel nan Carrick hian Ayden Heaven chu centre-back aṭangin left-back-ah a pawt chhuak maithei a ni.
Midfield laili lamah Carlos Baleba chu a hamstring hliam avangin hun engemaw chen a inlan thei dawn lo tih nemngheh a ni tawh a. Kar laia inkhelah khan Youri Tielemans chuan rawn thlakin, a club hlui hmachhawn tur hian bul a ṭan ve leh ngei a rinawm a, Kobbie Mainoo nen midfield laili an luahdun tura ngaih a ni.
Attacking midfield-ah an captain Bruno Fernandes chuan bul a ṭan ngei dawn a, mahse Amad Diallo erawhin a bul a ṭanpui kher lo mai thei. He Ivorian winger hian Thawhleh zana an inkhelh ṭum khan theihna a phochhuak tam tawk lo hle a, a aia rawn lut rawlthar Shea Lacey erawh a che ṭha em em thung a ni. He rawlthar tana hun ṭha pekna hun remchang tak a nih hmel a, Lacey hian right wing-ah bul a ṭan a nih chuan Matheus Cunha lailaia a khelh theih nan Bryan Mbeumo chu mual veilamah an sawn leh mai a rinawm bawk.
Cunha hian tun season chhungin tlar hma hruai kawngah harsatna a tawk deuh reng a, mahse Roma an hmachhawn ṭuma second half-a a khelh dan ropui tak avang khan Carrick hian he dinhmunah hian a lakah rinna a nghat nawn leh ngei a beiseiawm a ni.
Aston Villa hmachhawn tura United starting XI tura ngaih te chu: Senne Lammens; Diogo Dalot, Leny Yoro, Harry Maguire, Ayden Heaven; Kobbie Mainoo, Youri Tielemans; Shea Lacey, Bruno Fernandes, Bryan Mbeumo; Matheus Cunha te an ni.
