Manchester United defender hlui Gary Pallister chuan Crystal Palace midfielder Adam Wharton chu an club-in an lakluh ngei a duh thu a sawi a, he rawlthar theihna nei ṭha tak hi a lo khelhpui tawh ṭhin Manchester United legend Roy Keane leh Bryan Robson te nen a tehkhin hial a ni.
Transfer window khar a nih takah chuan, head coach Michael Carrick-a squad chu season chanve hmasa atan a inbuatsaih fel tawh a. Casemiro-a'n club a chhuahsan hnuah United hian tlar laili an thuam thar hle a, senior player pali lai an lalut a ni. Chelsea aṭangin Andrey Santos chu £50million-in an la a, goalkeeper Karl Darlow bakah Aston Villa playmaker hlui Youri Tielemans te an lak belh bawk. Midfield thuam nan Brighton aṭangin Carlos Baleba pawh £70m thleng kai thei turin an la lut fel bawk a ni.
Tun season-ah United hian bul ṭan fuh tawk lovin, Hull City lakah 2-0 in an tlawm a, Ipswich Town chu 5-2 in an sawp a, Everton nen 2-2 in an inhnehtawk bawk. An match hnuhnung berah erawh Champions League-ah Sabah FK chu 4-0 ngawtin an sawp thung.
United tana match 437 lai lo khel tawh Pallister chuan, a club hlui hian midfielder pathum lai la tawh mah se, tlar laili chu tihhmasawn an la mamawh cheu niin a hria a. Kum 22 mi Crystal Palace ace Wharton hi Old Trafford-a lut turin a duh ber a ni.
Betarades.gr nena an inbiaknaah Pallister chuan: "Wharton hian a hmasa berin hah taka thawh a hreh lo hrim hrim. Player i en reng rengin, khelmuala tuihalna leh chak duhna kha i en hmasak ber tur chu a ni — thil mawi leh nuam chin chauh khelh duh lo a, hna harsa leh thawkrim ngai zawng zawng thawh inhuamna kha a ni.
"Roy Keane leh Bryan Robson te ang player ropui tak tak bula lo khel ve thei kha ka vannei em em a, anni pahnih kha khatiang kawngah khan an ropui em em a ni. Tlar hma leh tlar hnungah an tlan tawn zak zak reng a.
"Hna hautak ber ber kha an thawk ṭhin a, chu ngei chu Adam Wharton-ah pawh hian ka hmu a ni. Ball pass a thiam lo ka tihna a ni lo, ball a pass thiam em em a, ball a thunun thiam hle bawk. Khelh dan phung pakhat chauh nei a ni lo a, thil thar siamchhuak thei khawpa thluak vawrh thiam a ni bawk.
"Player ṭha nihna tur tam tak a nei tling vek a ni. Tun dinhmunah chuan England squad-ah Elliot Anderson hi a hmaah a ding rih deuh maithei a, mahse Wharton hi player beiseiawm tak a ni a, a tawpah chuan club lian tak a la zawm ngei ka ring tlat a ni," tiin a sawi.
Kumin nipui transfer window chhung khan midfielder man to tak tak an inthleng kual nual a. Pallister-a sawi lan Anderson ngei pawh khan Nottingham Forest aṭangin Manchester City chu £116m-in a zawm a. City hian Chelsea aṭangin British record fee tlukpui £125m sengin Enzo Fernandez an la bawk a, Tottenham Hotspur pawhin Sandro Tonali chu £100m-in an la a, Mateus Fernandes pawh £85m-in an la lut bawk a ni.
Palace lam erawh chuan Wharton chu hralh an tum loh thu nghet takin an puang a, Selhurst Park-ah a cham chhunzawm ta a ni. Mahse Conference League nomawi lo la tawh tu Wharton hi thlasik transfer window inhawng leh hunah club lianten an hel leh ngei beisei a ni a, Manchester United pawh he tlangval dawr tura sawizawm zingah hian an tel reng a ni.
