Kar tawp hian Manchester United chuan ram chhung inelna lamah an rilru an pe leh tawh dawn a, Old Trafford-ah an elpui lian Manchester City an mikhual dawn a ni. Michael Carrick-a enkawl team hian an league match hmasa pathum aṭangin point li chiah la hlawhchhuak rih lo mah se, Champions League-ah Sabah chu 4-0 ngawta sawpin boruak ṭha tak an nei chho mek a ni.
January thlaa 2-0 a an hneh ṭum ang khan Carrick chuan hnehna chan nawn leh a beisei hle a, khatiang result ṭha tak tak a neih chhoh vang khan permanent manager hna hi a chelh nghe nghe a nih kha. Mahse, khami ṭuma an hneh kha Pep Guardiola-a naute an ni a, tunah erawh Catalan manager hi Enzo Maresca chuan a thlak tawh thung a ni.
United hian mahni muala an league match hnuhnung bera Ipswich Town an hmachhawn ṭum khan goal nga ngawt an khung a, mahse kar tawpah erawh fiahna khirh zawk an hmachhawn ngei a rinawm. City hian hmahruaitu dinhmun hauh chungin he match hi an hmachhawn dawn a, mahse Inrinni zana Sunderland lakah Arsenal an chak a nih chuan inkhelh ṭan hmain an dinhmun aṭangin an tla thla thei bawk a ni.
Mualneitu lam hian Pathianni inkhelah an tlarhma theihna an phawrhchhuah vek a ngai dawn a, Marcus Rashford an la kawl zui thei chu an tan vanneihna a tling hial maithei a ni.
Manchester United academy coach Adam Lawrence chuan rawlthar duhawm JJ Gabriel-a chet ṭhat em avangin a dinhmun chungchang a sawifiah a. Gabriel hian UEFA Youth League-ah Sabah lakah hat-trick a siam a, mahse first-team competitive match-a inlan theihna hun erawh a la nghak mek a ni.
Kum 15 mi chungchang sawiin Lawrence chuan, "JJ hi a theihna ringtu mi ṭha tak takte karah a khawsa a ni. Club thuneitu sang ber aṭanga a hnuai lam thlengin an ring tawk hle. Hun rei tak club-ah hian a lo awm tawh bawk a, player-te leh staff-te nen pawh inlaichinna ṭha tak an nei a ni.
"Hun a kal zel a, chu pawh chuan a pui hle bawk. Tun dinhmunah chuan a khelh dan te, a match khelh tur programme leh a training programme te chu ngun takin kan buaipui a, level hrang hrangah a theihna pholanna hun dik tak a hmuh theih nan kan thawk a ni.
"Thil famkim chu kan ti thei bik lo maithei a, mahse hei hi chu kan ngaihtuahna kan sen nasat em em thil a ni. Chuvangin, football a khelh nuam a ti a, dinhmun ṭha taka a awm kan hmu hi a lawmawm takzet a ni," tiin a sawi.
Barcelona transfer chief Deco pawhin kumin nipui chhung khan engvangin nge Catalan club hian Marcus Rashford a ngheta lalut lova Anthony Gordon zawk an lakluh tih a sawifiah ve bawk. Rashford hian season liam ta khan loan-in goal leh assist a ngah hle a, mahse Barca chuan United forward man pek theihna (buy option) hmang lovin man to zawk Gordon chu an thlang ta zawk a ni.
Marca hnenah Deco chuan, "Nikum lama kan thil hmuh chhuah harsa tak pakhat chu, Raphinha kan chhawr theih loh chang khan team tha leh chakna kha a kiam tlat ṭhin a ni. Winger eng emaw zat kan thlithlai a, mahse Premier League player-te lakluh chu a theih loh tluk a ni, sum sen ngai zat i hmu thei ang.
"Ani (Gordon) kha kan squad mamawh nena inmil ber chu a ni a. Hlawkna lian tak pakhat chu player-te hian kan project rawn zawm hi an phur em em a ni," tiin a sawi.
Gordon hian Spotify Camp Nou-ah bul a ṭan ṭha hle a, a match hmasa pangaa inlanah assist vawi nga lai a nei tawh a ni. Chuti chung chuan season liam taa Rashford-a'n goal 14 leh assist 15 a neih tluk tur chuan kawng thui tak a la zawh a ngai thung a ni.
