Pathiannia Old Trafford-a Manchester derby an khelh hunah, Manchester United centre-back te chuan an hmachhawn tur chu an hre chiang hle. Manchester City tan Erling Haaland chu teamsheet-a hming chuang hmasa ber tur a ni a, a chhan pakhat chu club-in senior striker puitling an kawl chhun a nih vang a ni bawk. Mahse, Harry Maguire leh Lisandro Martinez te tan chuan hmachhawn tur hriat lawk ringawt hian hna a tisiawm phah chuang lo.
Haaland hi dan chawp a harsa hle a, mahse January thla khan United defender pahnih hian an lo thunun hneh tawh a, a lo kal dan tur erawh an inralring thei ang. City centre-back te erawh chuan hetiang hun ṭha hi an nei ve miah lo thung.
City tlarhnung lamin an hmachhawn tur chu tisa tha chak tak, ball kang inchuh thiam, ball chelh nghet thei leh tlarhnung tawp bera nawr tlat ching Benjamin Sesko a ni thei a; a nih loh leh minute 20 chhung pawha hmuh tur awm lo khawpa mual laili lama tlan kual ṭhin Matheus Cunha pawh a ni thei bawk.
Sesko-a'n goal lam pan tlat a tum laiin, Cunha erawh chu a letling zawngin a che thung ṭhin. False nine anga a khelh chang phei chuan, a awmna tlangpui chu Bruno Fernandes ai pawhin a hniam zawk a, khingpui tlarhnung paltlang tum aiin an dinhmun aṭanga pawh pen leh a ṭhiante nena in-pass kual a ngaihtuah ber ṭhin a ni.
Everton laka Hill Dickinson Stadium-a an inkhelh ṭuma Cunha-a khelh dan kha entirna ṭha tak a ni. Khelmual hmun tinah a tlan kual a, mahse centre-forward pangngai anga box chhungah hmuh tur a awm meuh lo. Head coach atana Michael Carrick a lo kal aṭang khan zalen taka che kual thei tlar hma mi pathum hman hi a ngaina a, season liam ta pawh khan Bryan Mbeumo chu he dinhmunah hian a chhawr ngun hle a ni.
Everton laka Sesko-a a rawn luh khan team tan innghahna tak tak a rawn siam a, Luke Shaw-a ball cross chu mawi taka tauh lutin United hma a hruaipui a nih kha. Opta data enin, minute 70 chhungin Cunha hian shot vawi 2 chauh nei mah se, ball vawi 42 a khawih a, pass vawi 28 a nei a, a xG chu 0.12 chauh a ni. Sesko erawh chuan ball vawi 7 chauh khawihin pass vawi 5 a nei a, shot vawi 2 a neih aṭangin goal a thun nghal mai a ni.
Ningani zana Sabah an hmachhawn ṭum khan an pahnihin bul an ṭan dun a, goal an khung ve ve bawk. Cunha chuan veilam sir aṭanga lutin goal a khung a, Sesko erawh chuan No.9 dik tak tihdan phung hmangin offside trap a tlang a, goalkeeper bum kualin goal mawi tak a thun thung.
Mahse Manchester City lakah chuan an pahniha bul an ṭan dun a rinawm loh hle. Marcus Rashford chu squad-ah a rawn inlan leh tawh ngei a beiseiawm a, Amad-a awm loh avangin Mbeumo pawh dinglamah a inlan a ngai dawn bawk. Chuvang chuan Carrick-a tan Cunha nge Sesko zawk false nine emaw No.9 atan hian thlan tur tih chu ngaihtuahna sen ngai ber a ni ta a ni.
Carrick chuan an theihna a inang lo tih a hria a, hetianga thlan tur chi hrang hrang neih chu nuam a tih rualin, khingpuite khelh dan azira thutlukna siam a ngaih thu a sawi. January thlaa City an hmachhawn ṭum khan zalen taka che kual thei tlarhma a chhawr a, hei hian Cunha-a'n hmun a chan zawk theihna chance a siam maithei a ni.
Carrick chuan, "Theihna danglam tak an nei ve ve a ni. Team anga kan thiltum leh khelh kan tum dan chu player inthlak avangin a danglam lutuk lo turah ka ngai a, mahse kawng hrang hranga thlan tur min siamsak a ni," a ti.
"Khelh dan phung bik kan neih chu kan la kalpui reng a, mahse Ben, Matheus, Bryan emaw Marcus-a te hian hlauhawmna thlen dan hrang ṭheuh an nei a ni. Chuvangin khingpuite khelh dan azir te, kan team balance leh hmun awl kan nawr duh dan aṭangtein thutlukna kan siam ṭhin a ni," tiin Carrick chuan a sawi belh bawk.
Brazil tana No.9 kawr ha a World Cup lo khel tawh Cunha hian he hmun hi a luah thei tih lantir tawh mah se, Norway laka a chet chhiat em avanga lakchhuah a nih khan zalen taka inthleng kual ṭhin tlarhma hian hun harsa an tawk thei tih a tilang chiang hle. Mahse United tan chuan Sesko anga plan B ṭha tak an nei hi thil lawmawm a ni a, City lakah pawh hian chu chu a dinhmun a ni leh maithei a ni.
