Pathiannia Manchester derby-a Manchester City an hmachhawn hmain, pundit lar Paul Merson chuan Manchester United transfer kalpui dan chu na takin a sawisel a. Club thuneitute chet dan chuan head coach Michael Carrick chu squad chhah tawk lo leh tlarhnung ṭha tawk lo a pe niin a sawi chhuak a ni.
Kumin nipui transfer chhung khan United hian midfielder pathum lai la lut mah se, a tawp lamah an ngaihven viau chungin left-back lakluh an nei ta lo a. Tun dinhmunah kum 31 mi Luke Shaw chauh chu senior left-back awmchhun a ni a, kum 19 mi Harry Amass chauh chu a thlaktu pangngai awmchhun a ni. Patrick Dorgu chu tlarhma lamah chhawr a nih bawk si avangin, he position-ah hian United an indaih lo hle a ni. Carrick hian Shaw-a fitness hi a dimdawi hle a ngai a, a inhliam leh a nih chuan tlarhnungah player remchawp an chhawr a ngai dawn a ni. Tun season Premier League match thum chhung lekah United hian goal 6 ngawt an chhuah tawh bawk.
Sky Sports-a a thuziah tharah, Arsenal player hlui Merson chuan United chet dan leh an khelh ṭhat tluantling theih loh dan chu tarlangin, season bul ṭan tir chauh la ni mah se Pathianni derby match chu an season awmze hril thei tur match pawimawh tak a nih thu a sawi.
Merson chuan, "Man Utd hian Manchester derby an hmachhawn dawn a, an season hmabak pawh a innghat thui hle. Man City i hneh a nih chuan i kang dawrh dawn a; mahse Man City lakah i tlawm a nih chuan thil ngaiah bawk kan kir leh ang. Everton match nen chhiarin game hnih aṭangin point khat chauh an hmu dawn tihna a ni a, an vel ami club dangte erawh an chak chho zel thung si a ni.
"Ka lo sawi fo tawh ṭhin ang khan: Man United hian player an la ṭha tawk lovin ka hria. Squad a lian tawk lo a, a tlem mah mah a ni. Tlarhnung venhim lamah pawh an theihna a la hniam lutuk. Everton lakah goal hnih ngawt an chhuah a—goal ṭha tak ve ve an ni na a, pakhat phei chu penalty box pawn hret aṭanga lut a ni. Ball hnungah an player zawng zawng an awm vek a nih kha.
"Hma i hruai lai a nih chuan forward dang dah lut zawk rawh. Forward la chhuaka defender dah luh zawk tur a ni lo. Khingpui lamin hun ṭha an neih theihna tur siamsak suh. Midfielder emaw forward emaw aiah forward dang i dah luh zawk chuan, inkhel boruak a thlak thawk thei a ni. Khingpui manager i nih chuan, 'Awihawm loh, engtin nge ka tih tak ang?' tiin i ngaihtuah zui ngei ang.
"Mahse Man United chuan an chungah pressure an inhnawn luh tir ta hlauh a ni. Club lian i nih phei chuan khatiang kha tih miah loh tur a ni. Coventry i ni a, Everton lakah hma i hruai a nih chuan defender dah luh chu a awm lutuk. Mahse Man Utd i nih chuan khatianga tih kha a ṭulna ka hre lo. Inkhel i thunun hneh a nih chuan Everton-in Ainsley Maitland-Niles-a hmang khan chance khatiang kha an nei thei miah lo ang," tiin a sawi.
Merson chuan United dinhmun a ngaihtuahawm hle tih sawiin, chu vang tak chuan tun season-ah an top five zingah pawh a dah loh chhan a nih thu a tarlang a. "Ka ngaihtuah hle a ni—season ṭan tirh pawha Manchester United ka top five zinga ka dah loh chhan pawh kha hei vang hi a ni. Chuta ṭang chuan ka ngaihdan a la danglam lo reng reng. Draw i neih hian a nghawng a na ṭhin hle a ni," a ti bawk.
Merson hian a club hlui Arsenal chu a zawnin Premier League title an lak a ring a, Liverpool chu pahnihnaah a dah bawk. A top five hrang hrangah Chelsea, Manchester City leh Tottenham te zep telin, United chu parukna (6-na) ah chauh a dah thung a ni.
