Kumin nipui bazar chhunga Manchester United zawmtu Brazilian midfielder Andrey Santos chuan, an club dinhmun hniam mek leh harsa tak chu siamṭha leh thei turin player pawimawh panga an neih thu a sawichhuak.
Michael Carrick-a'n Old Trafford-a mawhphurhna a lak leh hnuah season liam ta khan United hi Premier League-ah pathumna niin Champions League khel turin an tling a. Casemiro a chhuah tak avangin tlar laili siksawi ngai tura ngaih a ni a, mahse an lakluh tharte'n tlar lailia theihna phochhuah zui leh nan hun an mamawh hle a ni.
Kobbie Mainoo-a hliam chhungin kum 22 mi Santos hian inkhelhna hmun a chang tam chho hle a, Nilaini zana Champions League match-a Italy ramah Como laka 4-1 ngawta an tlawm ṭum khan bul a ṭan a, Pathiannia Bournemouth an hmachhawn turah pawh a bul ṭan zui leh ngei beisei a ni bawk.
Como laka an tlawm tak avang khan manager Michael Carrick-a lakah pressure a sang hle a, United hian tun season-a inelna hrang hrangah match 11 an khelh tawh aṭangin vawi hnih chiah hnehna an la chang a ni. Hemi avang hian Pathiannia Bournemouth lakah point pathum an hmu lo a nih chuan Thawhṭanni lamah Carrick-a he hna aṭanga ban a nih mai an huphurh hle.
Premier League Productions’ Preview Show-a a inlannaah Santos chuan team leh staff bakah supporter-te inlungrual a ṭul thu sawiin, dynamic thar siam thei tur player panga an neih thu a tarlang. Santos chuan, "Tuna kan dinhmun thlak danglam a, kawng dik zawha kir leh tur chuan kan staff te, player te leh kan supporter-te kan ṭangtlang tur a ni. Kan inrin tlat a ngai a, mi tin mai hian thil thlak danglam kan duh vek a ni. Nitin kan harh vanga rim taka hna kan thawh a ngai, a chhan chu player ṭha tak tak kan kawl a ni - Carlos, Mason, Bruno, Kobbie leh Youri te an awm. Chuvang chuan kan inkar inzaipawhna leh inzawmna hi a pawimawh em em a ni," tiin a sawi.
Santos-a sawi lang zinga mi Mason Mount hian Chelsea aṭanga a rawn zawm hnuah hliamin a tlakbuak ngun em avangin rinawm takin a inlan tam thei lo hle a. Mahse, Italy rama an chet chhiat zawi hnuah hian amah leh player dang tarlan tak Carlos, Bruno Fernandes, Kobbie Mainoo leh Youri Tielemans te pawh rawn harhchhuaka mawhphurhna la turin fan-ten an beisei tawh hle a ni.
