Carrington-a Bournemouth an hmachhawn hmaa press conference neihah, Manchester United head coach Michael Carrick chuan zawhna chhan nghal mai lovin thu a sawi hmasa a. United hlutna leh ziarang chungchang thui tak a sawi hnuah, Pathiannia Old Trafford-a Premier League match khelh turah captain Bruno Fernandes chu squad aṭanga dahchhuah a nih dawn leh dawn loh chungchangah thutlukna a la siam fel loh thu a tarlang.
A ṭhut huna chanchinbumite zawhna chhan nghal mai ṭhin dan kalhin, Carrick hian ṭawng hmasak a dil a. BBC Sport-in an chhinchhiah danin minute nga leh second 30 chhung zet he thu hi a sawi a ni. United hian inelna hrang hrangah a zawnin match sarih chhung hnehna an chang tawh lo a, Champions League-a Como laka 4-1 a an tlawm hnu phei chuan boruak a rit zual hle a ni. Carrick chuan Como laka an khelh dan chuan a ti na hle tih a pha lo va, a enkawl ṭan tirh thla nga chhunga an ṭan nat dan aṭangin an pial deuh tawh tih a pawm bawk.
Carrick chuan, "He football club leh a ṭantute aiawh zo, an chhuang em em theih tur team khelmuala chhuahtir hi ka mawhphurhna a ni a, kan identity kan pholang ngei tur a ni," tiin a sawi. Ryan Giggs, Wayne Rooney leh Sir Alex Ferguson-a te chu club dah hmasatute entirna atan hmangin, he club-a awm mai hi ngaihtuahna dik lo leh phu bika inngaihna (entitlement) a awm theih loh thu a sawi bawk. Ngaihdam dil aiin beiseina nei chungin, "Kan kawng kan bo ṭhelh a ni maithei e, mahse kan nei let leh dawn a ni tih ka chiang takzet a ni," a ti bawk.
Hemi hnu hian zawhna zawng zawng deuhthaw chu captain Fernandes-a dinhmun chungchang a ni chho a. Como laka an tlawm hnu khan Fernandes hian Carrick-a tactics hman a sawisel a nih kha. Mahse, club thudawnna chuan he Portuguese midfielder hian armband a la hreng zui dawn tih leh hremna (fine) a tawk lo dawn tih BBC an hrilh thung.
Kum 32 mi Fernandes chungchang an zawh chianna chu Carrick chuan a kalsan duh bik lo va: "Ka tana pawimawh ber chu team leh squad inpumkhatna hi a ni. Club tana ṭha ber tur apiang chu ka ti zel dawn a ni," tiin a chhang. Fernandes nen an inbia em tih a tarlang lo va, dressing room chhungah inṭhenhranna a awm loh thu a sawi bawk. Nilaini zana squad Italy rama an awm laia Cheshire-a Fernandes-a in rawk a nih avangin club-in an chhungkua chu theih tawpin an ṭanpui thu a sawi tel bawk a ni.
Player dinhmun lamah erawh chanchin lawmawm a awm thung. Como laka hrem avanga inlan thei lo Leny Yoro chu a kir leh tawh dawn a, natna vanga Como leh Leeds match hmaih tu Ayden Heaven pawh a dam tawh a ni. Hliam vanga rei tak chawlh hnuah Como laka rawn inlan Matthijs de Ligt pawh tlar hnung tan chhawr theihin a awm bawk. Lisandro Martinez leh Marcus Rashford te erawh an fit chiah loh thu tarlan a ni a. Patrick Dorgu, Luke Shaw, Kobbie Mainoo, Manuel Ugarte leh Benjamin Sesko te erawh hliam vangin an inlan thei dawn rih lo a ni.
