Manchester United leh Premier League-a an elpui Everton te chuan forward Marcus Rashford-a chungchangah inbiakna an nei ṭan nia report tarlan a ni.

January transfer window inhawng turah hian Everton hian Rashford hi loan inremna hmangin nge an lakluh duh anga, a nghet tak takin (permanent transfer) an lei zawk dawn tih erawh chian a la ni lo.

Kum 28 mi English forward Rashford hi Barcelona-a loan-a a khelh zawh hnuin kum 2026 nipui chhung khan Manchester United-ah a lo kir leh a ni. Mahse, United tan tun season chhungin goal leh assist (goal contribution) pakhat mah a la nei tlat lo a, tun dinhmunah pawh a kawng leh fek hliam (hip injury) avangin khelmual a chhuahsan rih a ni.

Report hrang hrang tarlan danin, United hotute chuan Rashford-a form leh theihna phochhuah tlem lutuk avangin nipui transfer window chhung pawh khan hralh theih tura thutlukna lo siamsak tawhin, chhuah tir pawh an lo hreh lo tawh hle a. Mahse, club dang nen inremna an siam tak loh avangin Old Trafford-ah hian a cham chhunzawm ta a ni.

Tunah erawh Premier League-a an elpui Everton chuan a chungchangah inbiakna hmasaber an rawn neihpui ta hlauh mai a, thudawnna hrang hrang ten an tarlan danin inbiakna hi hma chhuak zelin January thla hian thui tak a thleng chho thei bawk.

English forward tan hian Old Trafford-a a hma hun zawng zawng pawh a chiang lo hle a, January transfer bazar inhawng turah hian Everton panin club tharah chona thar a hmachhawn dawn ta nge tih chu nghah a ngai dawn ta a ni.