Manchester United-in ni 54 chhunga a vawikhat nan hnehna an chan hnuah, head coach Michael Carrick chuan intihpachang lo mah se Roma laka Champions League comeback an neih chu club tan "zan pawimawh tak" a nih a rin thu a sawi.

Old Trafford-ah United hi match ṭan aṭanga minute 17 lek a liamin 2-0 ngawta an hnufual avangin a zawnin match 10 chhung hnehna nei lo tura ngaih an ni hman a, international break hma hian Carrick-a hna pawh a derthawng hle a ni. Mahse second half minute 60 hnaihah Bruno Fernandes chuan penalty aṭangin goal khat a rawn khung a, match zawh dawn minute 7 chhungin Matheus Cunha chuan goal hnih ngawt rawn khung lehin 3-2 in an chak ta thut a ni.

He hnehna pawimawh tak hian a hma hun chiang lo tak hmachhawn mek Carrick-a tan hahdamna tlem a rawn thlen a. Carrick chuan, "Thil thleng avang hian ka inti aipuar vak lo. Zan pawimawh tak erawh a ni tih ka hria. Tun season-a rawn zawm thar player ṭhenkhat leh season liam taa rawn lut, hetiang boruak Old Trafford-a la tawn ngai lo ten he boruak hi an hriatthiam a, an tawn ve hrim hrim hi a pawimawh hle a ni," tiin a sawi.

Carrick chuan sawi zawmin, "Engtikah nge hetiang thil a thleng ṭhin a, eng ang rilru nge put ngai tih hi a taka i tawn a, i ṭang tlut tlut hnuah a lehhthalna i neih hma chhung chuan i hre thiam tak tak lo ang. Mahse kan inbengdaih a, kar tawpa match lian tham hmachhawn tur hian kan inbuatsaih a ngai a ni," a ti bawk.

Kum 45 mi Carrick hian tun season-ah hun harsa tak tak a lo hmachhawn tawh a, a bikin Old Trafford-a Bournemouth laka 3-0 a an tlawm ṭum phei khan fan-te au elna (boo) an tawk hial a ni. Roma laka hnehna an chan hnu hian Carrick chuan player-te leh fan-te chu a chhuan thu a sawi a, "Player-te hi an chungah ka lungawi hle a, dinhmun harsa tak aṭanga rawn ding chhuak leh thei hi fak an phu a ni. Fan-te pawh an fakawm takzet a, kan hlawhtlinna hi an chak tawh takzet tih ka hria a ni," a ti.

Match 10 chhunga a vawikhat nan an chak tak avang hian hahdam takin a muhil thei tawh ang em tih an zawhna chu chhangin, "Ira, teuh lo mai, hahdam takin ka muhil phah chuang lo. Relief (hahdam huai) anga ngaih chi a ni lo. Player-te tana ka hlimna zawk a ni. Team tana an thawhdan leh an inpekna hi ka hria a, 100% in keima chungchang ka ngaihtuah lo, khelmuala thil hmun dika kan tih huna boruak ṭha kan thlen theih hi ka hlimpui ber a ni," tiin a sawi.

Carrick-a naute hian kar tawpah Premier League match pawimawh takah Aston Villa an hmachhawn leh dawn a ni.