Tuesday zan Champions League inkhelah Manchester United chuan Old Trafford-ah 3-2 in Italian club Roma an hneh a. First half-ah 2-0 in mualneitu United hi an hnufual hman a, mahse second half-ah ropui takin an rawn kir leh a ni. Second half inṭan hnuah Bruno Fernandes-a'n penalty aṭangin United tan goal hmasa ber a khung a, hemi hnu hian Brazil forward Matheus Cunha chuan goal hnih ngawt rawn khung lehin United chakna goal pawimawh a thlen ta a ni.
Mahse, Cunha-a'n chakna goal a khung hnu hian a goal khung lawmna avangin yellow card a hmu a. Hemi hnu minute tlemte lekah fawl sual hluah lehin yellow card pahnihna a hmu a, mual aṭanga hnawhchhuah (red card) a ni ta a ni. Red card hmu a hnawhchhuah ni mah se, he Brazil international hi dressing room-ah kal nghal lovin, pitch sira advertising board chungah ṭhuin match tawp lam minute-te chu a thlir chhunzawm a ni.
Referee whistle a rik hnuin, Cunha hi a team-mate-te nena hnehna lawm tura khelmuala luh leh a tum a, heti a nih lai hian manager Michael Carrick nen an inhmuchhuak a. United boss Carrick leh Cunha te hian inbiakna tawi neiin, Carrick-a'n he player hi hremna belhchhah a tawh loh nan dressing room pan nghal turin a hrilh a, staff pakhatin khelmual pawn lamah a hruai chhuak ta a ni.
Hemi thil thleng avang hian Cunha hian hremna belhchhah a hmachhawn thei zawk dawn nia hriat a ni. IFAB Law 12 (fawl leh nungchang ṭha lo enkawltu dan) hnuaiah chuan, player hnawhchhuah tawhte chu khelmual chhuahsanin dressing room emaw spectator area-ah an awm ngei ngei tur a ni. Red card hmu tawh si khelmuala lut leh a, team hnehna rawn lawmpui hi dan bawhchhiatna lian tak anga ngaih a ni a, match chawlh belhchhahna leh player leh club tana pawisa chawitirna (fine) a thlen thei a ni. Referee official match report a thehluh hnuah Cunha-a hremna tur hi a lang chiang zawk ang.
Red card a hmuh tak avang hian thla thar lama Sporting CP nena Champions League match khelh turah Carrick-a naute tana inlan thei dawn lo sa Cunha chuan inkhelh zawhah sawiin, "Red card ka hmuh kher loh kha chuan zan thlanawm tak leh mawi tak a ni. Club tana thil ropui leh mak tak thlentir hi ka suangtuah ṭhin a. Season hun harsa tak kan hmachhawn meklai hian hetiang comeback hi kan mamawh em em a ni. Vawiin chu ka tana ni malbawl tak a ni a, hun harsaah hian mawhphurhna ka lak a ngai a nih chuan lak ka inpeih reng a ni," tiin a sawi.
He hnehna hian United season thlak danglam thei tak tak angem tih zawhna chhangin, "Tunah a nih loh chuan engtikah nge ni ang? Ka hlim a, ka ṭhiante pawh an hlim em em a ni. Season inṭan aṭangin sawiselna tam tak kan hmachhawn tawh a, second half-a kan mizia leh rilru puthmang kha a mawi takzet a ni. Hei hi tun season-a kan insiamremna tur (turning point) ni rawh se," tiin a sawi bawk.
Goal a khung hnua a lawm dan chungchang CBS Sports hnena sawiin Cunha chuan, "Hetianga goal khung hnua lawm hi ka lo suangtuah ṭhin a. Mahse Roma fans-te awmna zawn a nih avangin ka zuang lut ngam chiah lo a ni. Engpawh nise min lo lawmpui em em a, hun mawi tak a ni," a ti.
United hian match 9 ngawt chak nei lova an chawlh hnuah hnehna hi an chang leh ta a, Premier League-ah erawh Cunha hi a khel thei thung ang. Kar tawp hian United chuan Aston Villa an hmachhawn dawn a, Carrick-a'n a hna a hum chhunzawm zel theih nan leh relegation zone aṭanga an fihlim theih nan he match hi a pawimawh hle dawn a ni.
