International break hnuah Manchester United chuan match pawimawh-ah point pawimawh an hloh chhunzawm zel a, Inrinni tlai Premier League match-ah mualneitu United hian Tottenham Hotspur chu lead nei hmasa chungin an hneh zo ta lo a ni.

Kum 27 mi Cameroon international Bryan Mbeumo chuan second-half-ah goal khungin Red Devils hi hma a hruaitir a. Mahse Old Trafford dugout aṭanga thlirruang Michael Carrick-a naute hian an hmahruaina hi an humhim zui thei lova, player 10-a khel Spurs lakah hian point thum hmuh theihna hunṭha an bawhchhia a ni.

Roberto De Zerbi-a hnuaia season ṭan ṭha lo tak, match nga khelh tawha chak nei lo (vawi hnih inhnehtawk leh vawi thum tlawm) Tottenham hian ṭan tirh te aṭangin United hi an nawr zawk a, first-half chhung zawng khan mualneitu United hi an nawr na hle a ni. Half-time hnaih lamah United hian boruak rawn nei chho in, second-half lamah Mbeumo-a goal hmangin hma hruai mah se, an vawnhim pui zo ta lo a ni.

Match zawha BBC Match of the Day hnenah United manager Michael Carrick chuan, "Match buai tak a ni. A ṭan tirh lamah khan kan harsat hle a, chhan hrang hrang vangin kan nihna tur kan phak lo a ni. Thil harsa tak a ni tih pawh hmuh theihin a awm," tiin a sawi.

Carrick chuan sawi chhunzawmin, "Inrintawkna tlachham kan nih pawh ka ring lo, mahse match hi a tlan liam chak em em a ni. Match-ah hian kalkawng dik kan hmu chhawn leh a, dinhmun ṭha takah kan inhlângkai a - hetianga kan awm hnua point kan hloh leh si hi thil pawi ber a ni," a ti bawk. Carrick hian match hnuhnung pahniha hun tawp lama goal an chhuah ṭhin chu pawi a tih thu leh dinhmun thunun thiam a ṭul zia a sawi tel a ni.

Red Devils forward Bryan Mbeumo pawhin Sky Sports hnenah first-half-a an chet chhiat thu hi a nemnghet ve a. "Match-a kan luh tak tak nan hun kan mamawh rei hle a, mahse second-half-ah erawh kan khel ṭha thung. First-half-a kan khelh dan kha chu keimahni tak tak kan ni lo, inthlakthleng kan mamawh a ni," a ti.

Mbeumo chuan Tottenham hmuhsit mai loh a ṭul zia sawiin, "Spurs hian player ṭha tak tak leh hlauhawm thei an kawl tih kan hria. A pawi kan ti hle a, thil tam tak siamṭhat kan mamawh a ni. Inkhelh tur a la tam avangin hmalam kan pan zel a ngai a ni," tiin a sawi bawk.

Premier League match paruk an khelh hnuah Manchester United hi 12-na dinhmunah an awm mek a, Roberto De Zerbi-a hnuaia bul ṭan ṭha lo tak Tottenham Hotspur erawh 18-na dinhmunah an awm thung a ni.