Inrinni zanah Manchester United leh Tottenham Hotspur te chu Old Trafford-ah 1-1 in an inhnehtawk a, he match-ah hian Tottenham striker Dominic Solanke chuan vawi thum ngawt (hat-trick) goal khung theihna hun ṭha a neih thu leh, khung zawk tur a nih thu a sawi chhuak.

Old Trafford-a inkhelah hian mualneitu Manchester United te an bul ṭan a chhe hle a, khualmual team Spurs hian goal khungna hun ṭha vawi engemaw zat an hmuh erawh an chhawr ṭangkai hleithei lo. United hian remchang awm chu bawhzuiin, minute 73-naah Bryan Mbeumo chuan goal hmahruai a rawn khung ta zawk a ni.

Goal an chhuah hnu minute nga lekah Tottenham lam tan harsatna a pung zui a, Rodrigo Bentancur chuan Luke Shaw-a chhang buaiin a lu hmanga a lo bawh deuh avangin red card tlang intawhtirin hnawhchhuah a ni a. Mi 10 chauhva khel mah se, Spurs hian an beidawng duh lova, hun heu belh (added time)-ah Solanke chuan goal pawimawh tak khungin an siphurh a rawn sut a, point khat an hlawhchhuah phah ta a ni.

Match zawhah Sky Sports-a a rilru a tarlan danin, Solanke chuan hat-trick khungna khawpa chance ṭha a neih thu leh a chhawr ṭangkai tawk lo hle nia a hriat thu a sawi a. "First half-ah kha chuan inkhel kan thunun hneh hle a. Mahse goal kan hlah hnem em em a - hei hi tun season-a kan buaina ber a ni reng a ni. Goal engemaw zatin hma kan hruai tawh tur a ni a, engpawhnise point khat kan hlawhchhuak hi a ṭha ve hrim hrim e," tiin a sawi.

Solanke chuan an team ze ṭha tak lantir chu fakin, "Team lamin ze ṭha tak leh tumruhna kan lantir kha a ropui takzet a ni. A hmaa goal kan chhuah ṭhin ṭumah chuan kan phili mai ṭhin a, mahse vawiinahr erawh kan ṭangtlangin kan fight ṭha hle a ni. Hat-trick ka khung ngei tur a ni a, ka fimkhur tawk lo tih ka hria. Mahse beidawng lovin ka nawr chhunzawm zel a, goal khungna hmun ṭhaah ka awm thei ta hram a ni. He club ropui tak tana captain ka nih vawikhatna a ni a, goal ka khung tel bawk nen ka career chhunga ka hriatreng tawh tur a ni," a ti bawk.

He match-ah hian Tottenham hian expected goals (xG) 1.71 ngawt siam mah se, goal zawnah vawithum chiah an pet a. Kumin nipui chhung khan player lakluh nan £334m ngawt seng mah se, Spurs hian goal khung lamah harsatna an tawk chho mek a, an league match 6 khelh tawhah vawali ngawt goal khung lovin an khawhral tawh a ni. Solanke chuan, "Tun aṭang hian hma kan sawn chhoh zel a ngai a ni. Tun season-ah kan che ṭha tawk lo hle a, he match hian hmalam min pan pui a, thil ṭha zawk min thlen ngei ka beisei," tiin a sawi zui bawk a ni.