Tottenham Hotspur nena 1-1 a an inhnehtawk ṭumin Manchester United lam an che ṭha zawk zawk lo va, match boruak a zawi hle a ni. Hetiang dinhmun karah hian player pahnih chet ṭhatna chuan goalkeeper Senne Lammens-a mit a la thung.

Chung zinga pakhat chu midfield-a rawn lut Carlos Baleba a ni a, mual chhunga a rawn luh hnuah match boruak a rawn thlak danglam nghal hle a, inelna lian berah pawh a talbuai lo hle tih a pholang a ni. Baleba hian ball pe kualin, khelmual a luah hneh hle a, duel-ah chaktin ball a humhim ṭha hle bawk. Midfield laili-a Youri Tielemans-a'n bul a ṭanna tlar laili-ah phurna leh chakna thar a rawn thlen hle a ni.

Mahse, Lammens-a mit latu hi Baleba chauh a ni lo a, substitute-a rawn lut dang pawh an che ṭha hle. Second half-ah United hian inthlak vawi thum (triple substitution) an nei a, Baleba, Diogo Dalot leh Joshua Zirkzee te an rawn luh takah chuan an khelh dan a rawn ṭha chho nghal em em a ni.

Baleba-a phurna pek chu thil pawimawh tak ni mah se, Zirkzee-a'n a ram tana a form ṭha tak Old Trafford-a a rawn chhunzawm zel pawh a pawimawh takzet a ni. Striker kum 24 mi hi a che fuh hle a, Spurs defender-te fel takin a bum phei pawk pawk a, a ṭhiante hnenah hmun hlauhawmah ball pein, tharum hmanga innuai kawngah pawh a zawk bik lo a ni.

Benjamin Sesko hian hliam a tawh ngun em avangin, Zirkzee-a chet ṭhatna hian United tan awmze lian tak a nei a, first-choice striker ni thei turin a dinhmun a nghet chho mek a ni. Match zawhah Lammens chuan mipuite'n Baleba an fak liam liam laiin Zirkzee-a thawhhlawkna pawh a sawi lang tel a ni.

Lammens chuan, "Baleba tana ka hlim em em a ni. Training-ah pawh a theihna ka lo hmu tawh ṭhin a ni. A lo thlen tirh khan hliam tenau a neih avangin kar tir lamah kan hmu tam lo a. Mahse tunah chuan a theihna sang tak leh team tana a thil rawn thlen theih hi mi zawng zawngin an hmu tawhin ka ring," a ti.

"Amah chauh a ni lo, Josh [Zirkzee] pawh second half-ah match thunun nan a pawimawh em em a ni. Vawiina thil pawimawh berte zinga mi a ni a, an pahnih hian ka lawmpui hle a, hmakhuaah pawh team hi nasatakin min puih chhunzawm zel ka beisei a ni," tiin a sawi zui bawk.

Lammens-a'n Zirkzee-a'n match thununna a rawn thlen dan a sawi hi a pawimawh hle, a chhan chu United hi thil engemaw a kaltluang loh hlek hian an phili chawk ṭhin a ni. Hetiang hunah hian Zirkzee anga ball thiam leh thluak hmang ṭhin player-te hian boruak zaudawh tak an rawn thlen ṭhin a, team dangte hahdam taka thawk an lak tir theih phah ṭhin a ni. United hian match zawn zat tak (brutal schedule) an hmachhawn chho dawn avangin, Zirkzee hi bul ṭantir zeuh zeuh a, club tana main striker a ni thei a ni tih lantirna hun pek hi a pawimawh takzet a ni.