Premier League referee hlui Graham Scott chuan Manchester derby-a Manchester City chakna goal chungchangah, referee Michael Oliver chu khelmual sira monitor (screen) en tura hrilh tur a nih thu a sawi chhuak.

Old Trafford-a inkhelah hian Josko Gvardiol-a ball cross chu Erling Haaland chuan goal-ah a chantir a, mahse he goal luh hma thil thleng hian inhnialna lian tak a chawk tho zui a ni. Gvardiol-a ball vawrh luh chu a per hnuah back post lamah kalin, Lisandro Martinez chu Enzo Fernandez leh Haaland te inkarah a lo awm a. City midfielder Fernandez hian tauh tumin ball lamah a taksa a vawrh phei a ni.

A tirah linesman chuan offside a nih thu a lo phar a, mahse VAR enfiah a nih hnuah Chelsea midfielder hlui Enzo Fernandez chu inkhel tibuai lo (interfere lo) anga ngaiin, Patrick Dorgu-a pheikhawk chuan Haaland chu onside-ah a dah niin thutlukna an siam ta a ni.

Mahse, Premier League-a kum 10 zet lo referee tawh Scott chuan The Athletic hnenah sawiin, hetiang dinhmunah hi chuan Oliver-a'n thil thleng zawng zawng a pumhluma a enfiah theih nan monitor-a en tura hrilh kha a "awmze nei zawk" tur thu a sawi a ni. Official-te chuan rang taka thutlukna siam tura nawrna sang tak an hmachhawn ṭhin tih sawiin, VAR team lam pawhin "a ṭul tawpkhawk a nih loh chuan inrawlh loh" chu an thlang a ni maithei tih a sawi tel bawk.

Referee thuneitu pawl Pro Ref (PGMOL hlui) chuan he thilah hian tihsual a awm tih pawmin, thutlukna dik lo (error of judgement) a nih thu an puang a, enfiahna neih a nih tur thu an nemnghet bawk a ni.

Pro Ref thupuangtu chuan: "Pathiannia Old Trafford-a Manchester United leh Manchester City match minute 60-naa thil thleng chungchangah, Erling Haaland-a goal pawm a nih dan fiahna kan pe thei e. Khelmuala thutlukna siam hmasak chu Erling Haaland lakah offside a ni a, VAR hmanga enfiah a nih hnuah onside-ah a awm tih hmuh a ni.

"He attack-ah hian Enzo Fernandez chuan ball a khawih lo tih finfiah a ni a, chuvangin offside sual chu ngaihdan azira innghat a ni. Mahse, he ṭumah hian VAR chuan a dinhmun khan nghawng a neih theih dan a hmu thiam lo a, khelmual sira enfiahna (on-field review) nei turin thurawn pe tur a ni zawk. Tlai lam khan Manchester United hi bia-in kan thutlukna siam sual a nih thu kan hrilh a, he incident hi enfiah a ni ang," tiin thuchhuah an siam a ni.

United head coach Michael Carrick pawhin thutlukna siam dan chu a ngaihtuahawm hle tih a sawi chhuak ve bawk. Carrick chuan, "Ka hrethiam lo a ni lo, referee-te thutlukna pui turin hmanraw ṭha kan dah a, screen te, office-a referee awm te kan nei vek a ni. Mahse football inkhelh dan thlirna (interpretation) hetiang a nih chhoh zel chuan a ngaihtuahawm takzet a ni.

"Football khelh dan hrethiam tura kan dah, defender bula awm chunga ball lama taksa vawrh mektu player chu attack tibuai lo anga an ngai a nih chuan, ka tan chuan ngaihṭhatlohna lian tak a ni. Thutlukna mak tak a ni a, ka en nawn hnuah pawh ka hrethiam thei lo a, an thil sawifiah dan phei chuan a ti zualkai ting mai a ni. Inkhel a tibuai lo tia an sawifiah theih dan hi a awihawm loh zawk hial a ni," tiin Carrick chuan a sawisel zui bawk a ni.