Old Trafford-ah Manchester United chu an hmelma lian Manchester City lakah rual ban lo takin an tlawm a, tun season bul an ṭan chhiatna chu a zualzel ta.

He match-ah hian minute 23-na lekah Manchester City player Phil Foden-a'n red card hmuin hnawhchhuah a ni a, Red Devils hian hma an hruai theihna tur dinhmun ṭha tak an nei zui a ni. Mahse second half-ah Erling Haaland-a'n goal a khung a, a tirah offside tura ngaih ni mah se VAR engemaw vangin pawm a ni ta si a ni.

Match zawhah refereeing body (PGMOL) chuan thutlukna kha a sual a, goal kha pawm tura ngai a nih loh thu tlangtak in an pawm a, mahse United hian hmun ṭha zawk chang chungin minute 70 chhung zet mi 10 mi City tlarhnung an ṭhiat thei ta chuang lo a ni.

Season liam taa phurna awmsa kha match tinin a ral tial tial a, match li an khelh hnuah United hian point 4 chauh an la hmu a, campaign thar bul an ṭan chhe hle a ni.

Sky Sports hnenah thu sawiin United defender hlui Gary Neville chuan he match-a United chet dan chungchang a ngaihdan a sawichhuak a. Neville chuan, "Referee-te thutlukna chungchang ringawt ngaihtuah leh rilru dah lova, an khelh dan siamṭhat nana hma an lak ngaihte zawk hi an rilrua an dah ka beisei a ni," tiin a sawi.

Neville chuan sawi chhunzawmin, "Football player te emaw midang pawh nise inthiamlohna tur chhuanlam pek hi a ṭha lo a ni. Kha kha a ni mai. Chuvangin naktukah emaw, training an ṭan leh hun apiangah khelmualah chhuakin, mi 10 laka an khelh leh hun a awm pawha tih dan tur te an rilruah an dah a ngai tawh a ni," a ti bawk.

Head coach Michael Carrick-a thutlukna ṭhenkhat avangin Manchester United ṭantute rilru a buai phah hle a, a bikin number nine position-ah Benjamin Sesko aia Matheus Cunha a chhawr hmasak zawkin hotute leh pundit-te a ti bangbo hle. Neville-a ngaihdan chuan Carrick hian he thutlukna siamṭha tur hian hun a hmang rei lutuk nia a hriat thu a sawi.

Neville chuan, "Michael Carrick pawh hian siamṭhatna hma zawkah a lo nei lo a ni tih a inngaihtuah nawn ka ring. Half-time hma minute 20 vel aṭangin mi 11 ngawta i khelh chung pawhin thil a tluang lo tih i hriat khan, tlarhmaa insual pui turin Sesko hi a lut nghal tur a ni," a ti. Sawi chhunzawmin, "Thil a kal tluang lo tih chu a lang chiang reng a ni. Minute 67-na thleng a nghah hnuah chauh thleng a sawn a, hei hian Sesko tan minute 25 chauh hun a pe ta a ni. Hetiang thilte hi an zirchiang lehin an bihchiang nawn ngei ang tih ka chiang a, heng thil bawk hi an rilrua an dah a ngai bawk," a ti bawk.

United hian he defeat aṭanga inthingharh turin hun chawlh an nei rei dawn lo a, inkhelh tur a inawm hnaih si avangin Nilaini zanah Carabao Cup match-ah Brighton & Hove Albion chu Old Trafford-ah an lo mikhual ang.

Hemi hnu hian international break hmain match pakhat chiah khelh tur an nei tawh dawn a, Fulham hmachhawn turin Craven Cottage an pan thung ang.