Old Trafford-a Manchester derby inkhel hmuhnawm takah Manchester City chuan 1-0 in Manchester United an hneh a, mahse he inkhela chakna goal awmchhun Erling Haaland-a goal khung chungchanga VAR thutlukna siam chuan sawisel a hlawh zui nasa hle.
Khelmual chhunga referee leh assistant referee-te chuan Haaland hi offside-ah ngaiin a tirah goal hi an lo hnawl phawt a. Mahse VAR lamin an enfiah hnuah khelmual chhunga thutlukna siam chu rawn thlakin, goal hi an pawmtir ta zawk a ni.
Replay aṭanga a lan danin Haaland hi samzai khatah onside ni mah se, City midfielder Enzo Fernandez chu offside position-ah a awm chiang hle a, tlarhnung vengtu Lisandro Martinez leh goalkeeper Senne Lammens te tan tibuaitu lian tak a tling a ni. Martinez leh Lammens te hian Fernandez-a chet vel dan chu ngaihven a, lo ven a ngai tlat a ni.
Chutiang a nih lai chuan, VAR referee-te chuan Fernandez hian ball a khawih loh avangin inkhelhah inrawlhna (interfere) a nei lo tiin goal hi an pawmtir ta tlat mai a, hei hian mi tam tak a ti-bangbo hle a ni.
Manchester City goalkeeper hlui Joe Hart chuan Premier League Productions hnenah a ngaihdan sawichhuakin, hetiang thutlukna mak lutuk an siam chu a awih theih loh hial thu a sawi. Hart chuan, "He thutlukna siamtu mi zawng zawng hian Enzo Fernandez-a'n inkhelhah nghawng a nei lo tiha thutlukna an siam thei hi ka awih thei thlawt lo a ni.
"Enzo Fernandez kha khelmualah khan a awm a, ball chang tura chet a la bawk a, chu chuan goalkeeper [Lammens] kha a tibuai chiang em em a ni," tiin a sawi chhuak hial a ni.
Premier League referee hlui hmingthang Mark Clattenburg pawhin United in Focus hnenah he goal hi engti kawng mahin pawm tlak a nih loh thu a lo sawi ve bawk a ni.
Manchester United head coach Michael Carrick pawhin thutlukna siam dan chu hriatthiam har a tih thu leh a lawm loh zia a pholang a, defender Lisandro Martinez pawhin thuneitute hnen aṭangin hrilhfiahna chiang tawk a phut thu a sawi chhuak bawk.
He thil thleng avanga buaina leh sawiselna a nasat tak em avangin, referee thuneitu pawl Pro Ref chuan thuchhuah siamin, goal pawm a nih danah khan tihsual lian tak an nei ngei tih an pawm ta a ni.
