"Jude Bellingham thar" tia mi tam takin an sawi Leicester City rawlthar theihna ngah tak Louis Page chu Manchester United chuan an hmakhua thlirin lakluh an lo tum mek a. Mahse, he tlangval theihna ngah tak inchuhna huangah hian German club lian Borussia Dortmund an rawn inrawlh ve tak avangin United ruahmanna hi a buai chhoh phah maithei a ni.

Dortmund hi rawlthar theihna sang tak takte chher hriam thiam leh khelmuala hun tam zawk pe ṭhintu club an nih avangin, Page-a tan pawh hian Germany lama insawn chu thil thlakhlelhawm tak a ni thei a, hei hian Old Trafford club tan fiahna lian tak a siam theih a rinawm hle.

Manchester United hian nipui transfer bazar liam ta chhung khan an midfield chu thuam ṭhat tumin hma an la nasa hle a, player thar eng emaw zat lalut mah se, INEOS hruaitute leh club hotute chu tun dinhmuna an midfield player neih mekte dinhmunah hian an la lungawi tawk lo niin a lang.

Brighton aṭanga an lakluh Carlos Baleba chu a kerek hliam vangin a la inlan thei lo a, chutiang bawkin Chelsea aṭanga an lakluh Andrey Santos pawh khelmualah hun tam pek a la ni lo bawk. Hetiang a nih avang hian Red Devils hian tlar laili thuam chak nan hma lak belh zel an duh a, nakin thleng atana beiseina nei sang tak Leicester wonderkid Louis Page bakah hian, nakkum January transfer window inhawng tura an inbuatsaihnaah Borussia Dortmund midfielder Felix Nmecha pawh United nen hian sawizawm a ni mek bawk a ni.