Manchester United enkawltu nih hmaa manager hna thawh chhunzawm a hreh nia an player hlui Nicky Butt-a'n a sawi chu, United head coach Michael Carrick chuan a nuihzat mai mai thu a sawi.

'Good, The Bad & The Football' podcast-ah inlanin, Butt chuan Carrick nen an titi dunna chanchin a sawichhuak a. Middlesbrough-in manager hna aṭanga an ban hnu khan Carrick chuan manager hna thawh leh chu a ngam tawh chiah lo nia sawiin, club lian tak a nih loh chuan beih nawn leh a chak tawh lo tih a sawi nia sawi a ni.

Butt chuan, "Manchester United hna a chelh hma khan Michael nen kan awmdun a, manager hna chungchang kan sawidun nghe nghe a ni. Ani chuan, 'Aih, ka tan a ni ve lo, a hahthlak lutuk. Ka lu a na zo vek tawh. Hna lian tham a nih chauhvin ka ti leh ang, chu hna lian chu Manchester United chauh a ni mai,' tiin min hrilh a ni," a ti.

Tun hnaiah United-in result ṭha an hmuh theih loh avangin boruak a rit chho hle a, hetiang hun laia Butt-a'n an titi dunna a puangchhuak chu club hotute lam chuan an lawm lo hle. Mahse, Zirtawpnia chanchinbumite a kawmnaah he thu hi zawtin an zawh chhuah chuan, Carrick chuan nui chungin a ngaihtuah zui lem loh thu a sawi thung.

Manager hna thawh leh a chak tawh lo tak tak em tih an zawhna chu chhangin Carrick chuan nui chungin, "Chutiang thil chu a tak tak ni se, tunah hian helai hmunah hian ka awm tawp nang tiraw?" a ti.

Sawi zawmin, "Tun ka dinhmunah hi chuan he hna aia ṭha hi thawh tur a awm thei lo hrim hrim. Hei hi ka tana dinhmun ṭha ber a ni. He dinhmun ka luah thei hi hamṭhatna ropui tak leh mawhphurhna lian takah ka ngai a, chu mai bakah danglamna siam a, hetah hian hlawhtlinna chan ngei tumin phurna sang tak ka nei bawk a ni.

"Chuvangin ka hna hi nuam ka ti takzet. Harsatna eng emaw i tawh a, chu harsatna aṭanga talchhuah dan kawng i zawn a ngaih hun lai tak hi nuam ka tih zawk lai tak a ni bawk.

"Hetiang dinhmun hi ka hlimpui zawk em em a, a chhan chu hei hian hlawhtlinna chang tura phurna min pe a, hlawhtlinna kawng pakhata mi a ni reng bawk. Chutiang harsatna hmachhawn tur chuan i inpeih lo va, thil harsa i paltlang thei lo a nih chuan mi ropui i ni ngai lo ang. Chuvang chuan kan paltlang theih nan theih tawp kan chhuah a ngai a, chu chu ka hlimpui chho zel a ni," tiin a sawi.

United tana beiseina a san zia sawiin, mimal taka result ṭha mamawh vanga chiai mai a nih loh thu Carrick chuan a sawi a, Pathiannia Elland Road-a Leeds United an hmachhawn tur chu a nghahhlelh tawh thu a sawi bawk.

Leeds nena an inkhelh tur chungchang sawiin, "Tun hunah hian ka game hnuhnung ber tur ang zawngin ka thlir lo tawp mai, chu chu a chiang a ni. He match hi ka nghakhlel takzet. He club hi hmalamah theih tawpa nawr kal hi ka rilru luahtu ber a ni reng bawk.

"Zawn i duh a, hriat i duh a nih phawt chuan thil ṭha lo (negativity) lam hi chu hmuh tur a awm reng ṭhin. Mahse keichuan ka zawng ve duh lo a, hriat pawh ka duh lo bawk. Dinhmun dik tak chu ka hria a, thuhmun sawi nawn reng anga lang mah ila, kan awmna dinhmun hi ka pawm a, mahse rilru beidawng zawng erawhin ka awm lo.

"He hmun leh he football club tana ṭha ber turah chauh hian ka rilru ka pe pumhlum a, match-a chak theih dan tur leh kan theihna ang thlapa player-ten an khelh theih dan tur chauh ka buaipui a ni. Chumi tur chuan kan la inhlat lutuk lo tih kan hria.

"Thil tlemte kan lamah kan thlekkualtir theih chuan dinhmun ṭha takah kan ding leh vat ang a, hma pawh kan sawn chak viau ang. Chuvang chuan a hmaa ka sawi tawh ang khan, keima mimal dinhmun hi ka ngaihtuah lul lo a ni.

"'Engtin nge hei hi ka tawrhchhuah ang a, engtin nge ka inhim theih ang, keima mimal ka inngaihtuah nan eng nge ka tih ang' tih ang chi hi ka ngaihtuahnaah a awm ve lo. Chung chu a pawimawh ber lo. He football club leh match-a hnehna chan hi a pawimawh ber a ni," tiin United boss chuan a sawi bawk.