Manchester United neitu nih tuma Sir Jim Ratcliffe nen an inbeihnaa a tlawm hnu kum thum dawn liam hnuah, Sheikh Jassim bin Hamad Al Thani chuan football khawvela inrawlh theihna remchang dang a nei leh dawn niin a lang.
He Qatari sumdawng hausa pa, Sheikh Hamad bin Jassim bin Jaber Al Thani (HBJ tia hriat lar) chuan investment vehicle 'Al Mirqab' kaltlangin Italian club lian Inter Milan-a share neih tumin hma a la mek nia report a ni a, he pawlah hian Sheikh Jassim pawhin mawhphurhna pawimawh tak a chelh a ni.
Kum 2022-a Glazer chhungkuain Manchester United hralh an tum ṭan tirh khan, he banker hi club neitu nih tum zingah hming langsar ber pawl a ni a. Club pumhlum (full takeover) lei tum mah se, American neitute chuan 2023-24 season chanve vel khan Ratcliffe-a hnenah share tlem (minority stake) an lo hralh ta zawk a nih kha.
Italian chanchinbu Tuttosport tarlan danin, a pa HBJ hian Inter Milan-a minority stake neih theih dan tur chungchangah ṭawngkain inbiakna a lo nei tawh a ni. Tuttosport vek hian a tarlan danin, Nerazzurri neitu Oaktree Capital Management lam chuan club pumhlum hralh an tum lova, mahse thuneihna pui nei chuang lo tura share tlem (non-controlling interest) hralh erawh an inngaihtuah thei thung.
Kum 67 mi HBJ hi kum 20 chhung foreign minister a nih hnuin kum ruk chhung zet Qatar prime minister a lo ni tawh a. Forbes chhut danin a sum neih zat chu US$4.7bn (£3.52bn) niin khawvela mi hausa ber zingah 823-naa dah a ni a, Sheikh Jassim-a sum neih zat pawh Forbes chuan £900m leh £1.1bn inkar vel nia an chhut a ni.
HBJ-a yacht (lawng) hming chawia phuah Al Mirqab group kaltlang hian he politican hlui hian sum enkawlna (finance), hotel leh inhmun ropui (luxury real estate) lamah sum a thehlut hnem hle a. Tuttosport chuan heng an sum thehluhna zinga a tam zawk hi Italy ramah, a bikin Milan khawpuiah a awm niin a tarlang.
He chanchinbu vek hian a tarlan danin, Sheikh Jassim hian a hma pawhin 2024-a Oaktree hnena club hralhtu Suning aṭanga Inter hi lei a lo tum tawh bawk a, mahse club man chungchangah Suning nena an inrem theih tak loh avangin a inhnukdawk ta a ni.
Khelmual lamah chuan Inter hian tun hnaiah hma an sawn hle a. Kum 2025 khan Champions League final thlengin Paris Saint-Germain lakah an tlawm a, season thum liam ta chhung khan Serie A title vawi hnih ngawt an la tawh bawk.
Tun season European inelna lamah erawh Christian Chivu-a nauten hun harsa an hmachhawn mek a, Real Madrid leh Club Brugge lakah harsa takin an tlawm tawh a. Champions League-ah dinhmun khirh tak ding mah se, Serie A lamah erawh point 18 hmuh theih aṭangin point 16 hmuin hmahruaitu an ni mek thung.
Ratcliffe-a'n mawhphurhna a lak hnua a vawikhat nan Champions League inelna hmachhawn mek United lam erawh an season bul ṭan dan a fuh lo hle a. Europe lamah match hnih an khelh tawhah vawi khat chakin vawi khat an tlawm a, Premier League match ruk an khelh tawhah vawi khat chiah an la chak avangin table-a a hnuai lamah an la awm rih a ni.
