Manchester United leh Chelsea ten an ngaihven mek, Sweden rawlthar Oliver Mansson chuan thlasik (January) transfer window inhawng turah IFK Goteborg chhuahsan mai a inhuam thu a sawi chhuak.

Kum 17 mi midfielder hi Scandinavia khawmualpuia naupang theihna nei ṭha berte zinga mi a ni a, Europe-a club engemaw zatin an ngaihven mek a ni. English club Manchester United leh Chelsea te chuan a hmasawnna hi an thlithlai reng a, January transfer window a inhawn hunah lalut turin hma an la mai dawn em tih ngaihven a hlawh hle.

Mansson pawhin he chanchin sawi zui hi a pha hran lo a, winter window inhawng tur atana a hmakhua chungchangah a agent nen an inbiak thu Swedish chanchinbu GP hnenah a lo tarlang tawh a ni.

"Hemi chungchang hi ka agent nen kan sawi dun mek a ni. Tunah hian transfer window a rawn inhawng ṭep tawh a, thil thleng tur chu kan la hmu ang. Mahse, thu tam tak kan la sawi lo a, season bak ka rilruah a awm rih lo... ka cham zui dawn nge ka chhuak dawn tih chu kan hria ang," tiin a sawi.

Mahse, United leh Chelsea te hian Mansson-a thinlunga hmun pawimawh ber luahtu club dang an hmachhawn a ngai maithei. He rawlthar hian a naupan lai aṭanga a lo ṭan ṭhin Barcelona a duhsak ber thu zep a tum lo a, Nou Camp pan theihna hun ṭha a awm a nih chuan a chak hle tih a tarlang a ni.

"Thil tam tak thleng thei atan ka inpeih a ni. Ka naupan lai khan Barca ka ṭan ṭhin a. Katala club zawm hi kaimawh lian tak a ni ang. Ka khelh dan phung nen a inmil ber tur a nih bawk avangin chona thar tan ka inpeih vek a ni," tiin a sawi. Thla liam ta khan Mansson hian Katala club lian aṭangin "phone call a beisei" thu a lo sawi tawh bawk. Mahse Barcelona hian a khel lai en turin scout an la thawn lo a, hei hian club dangte tan kawng a hawnsak a ni.

Mansson hi season liam ta tawp lam khan Goteborg tan a senior debut siamin a inlan ṭan a, mahse tun season-ah erawh team-a mi pawimawh ber a tling tawh a ni. Starting XI-ah hmun nghet luahin a chet ṭhatna hmangin mi tam tak mit a la tawh a ni.

Goteborg hian inremna siamna kawngah dinhmun ṭha an luah a, he rawlthar tana transfer fee hi Swedish football chanchina man to ber dawng turin an chhiar ngam beisei a ni. Kum 2024-a Brighton-in Malick Yalcouye £7.6million-a an lak tawhna chu a khum ngei an beisei. Mansson hian Goteborg-ah hian kum 2028 thleng daih contract a nei a, club danga chhuah duhtu an tam em avangin a man tlawm tea hralh chhuah an tum hauh lo ang.

Manchester United lam pawhin rawlthar theihna ngah tak tak lak luh nana sum tam tak sen hi an zak ngai lo. Kum 2024 khan kum 18 mi Leny Yoro manah £59m an seng a, 2016 khan kum 19 mi Anthony Martial manah £36m an seng a, 2004 khan kum 18 mi Wayne Rooney manah £27m an lo seng tawh bawk.

United leh Chelsea chauh hi Mansson ngaihventu an ni lo. Thla liam taa Goteborg leh Djurgarden 1-1 a an inhnehtawk ṭum khan Roma, Freiburg, Leicester City leh Watford aṭanga scout lo kalte pawh stadium-ah an inlan ve bawk a ni.

He rawlthar pawh hian club lian ten an ngaihvenna hi nuam a ti hle a, mahse tun dinhmunah chuan khelmuala a hna hlen chhuah chu a ngaihpawimawh ber a nih thu a sawi.

"Club lian tak takten min rawn ngaihven hi nuam ka ti hle a ni. Min en tura an lo kal a nih chuan thil ṭha tak ka ti mek tihna a ni a. Mahse tun dinhmunah erawh khelmual chhung zawka chet ṭhat hi ka thil tum ber a ni," tiin a sawi bawk.