Manchester United-a a hlawhtling thei lo Jadon Sancho chuan club thar a zawn mek laiin, Spanish club Getafe chuan chawlkar pakhata £10,000 chauh hlawhna contract an chhawpchhuahsak ta.
Borussia Dortmund-a a seilen tirh leh a career bulṭannaah Bundesliga-ah che ṭha hle mah se, kum 26 mi winger hi Old Trafford-ah erawh a beisei angin a inlantir thei lo a ni.
Kum 2021 khan United chuan £73million ngawt sengin an lalut a, mahse England tlangval hian beisei a phak lo hle. A season hmasaberah goal 3 leh assist 3 chauh a nei a, 2022-23 season-ah match 26 inlanin goal 6 leh assist 3 a nei leh bawk.
Hemi hnu hian loan-in Dortmund-ah a kir leh a, mahse Germany-ah pawh a form hlui a hmu let thei tawh lo a ni. 2024-25 season-ah Chelsea-ah loan-in a chhuak leh a, London club hian a ngheta lakluhna (£25m obligation) nei mah se, a chet chhiat em avangin a man pek tur zawk £5m hremna (fine) pein United-ah an dihlet ta zawk a ni. Season liam ta khan Aston Villa-ah season tluanin loan-in a khel leh a, Villa pawhin a hmabaka zui zel an duh loh avangin kumin nipui khan United chuan an release ta a, free agent a lo ni ta a ni.
United-a a awm laia chawlkar pakhata £250,000 ngawt a hlawh ṭhin nena tehkhin chuan, tun hnaia Getafe-in season tawp thleng daih tur chawlkar pakhata £10,000 chauh pek an rawtna hi a tlahniam nasa hle. Telegraph-in a tarlan danin, Sancho hian he La Liga club pan hi a hnawl ringawt lo va, mahse thutlukna siam hmain Getafe head coach Jose Bordalas nen inhmuh a, inbiak phawt a duh a ni.
Tun dinhmunah Getafe hi La Liga-ah 15-na dinhmun luah mekin, match 9 an khelh tawhah vawi hnih chiah an la chak a ni. Coach Bordalas hian club hotute nen inhmangaih lohna lian tak an nei mek bawk. Kum 2023-a ruat 'Pepe' Bordalas hian La Liga leh Conference League khelh mekin, ni thum dan zela match hmachhawn a ngai chung pawha squad chhah tawk an nei lo chu club hotute a sawisel fo ṭhin a ni.
Chanchinbumite hnenah Bordalas chuan, "Kum tin an thil tiam hi an tihlawhtling ngai loh avangin bum nia hriain ka lungawi lo hle a ni. May thla aṭang khan match hmachhawn tur a tam dawn avangin season harsa tak a ni dawn tih ka lo hrilh tawh a, squad kan nei tawk lo a ni tih a lang ta a ni," tiin a sawi chhuak a ni.
He sawiselna avang hian club president Angel Torres chuan chhuak mai turin a hrilh a. Cadena SER hnenah Torres chuan, "A duh vanga contract ziak a ni a, a duh chuan a chhuak thei reng a ni. Kan chhia a nih chuan eng nge kan tih theih ang? Hei hi Getafe a ni. Kum 30 hnuah 'ka bum che' ti a min mawhpuh tur phei chuan hmela tak tak i nih a ngai ang," tiin a chhang let va va a ni.
