Manchester United assistant coach hlui Benni McCarthy chuan club dinhmun khirh tak thlirin, manager Michael Carrick chu ban vut vut lova chhawr zui zel a ṭhat thu a sawi chhuak.
Erik ten Hag-a enkawlna hnuaia United coach lo ni tawh McCarthy hian management team-te chunga pressure nasa tak awm ṭhin chu a hrechiang hle a. United hian October 2024 khan Ten Hag hi banin, a aiawhtu Ruben Amorim pawh kumin tir lam khan an lo ban tawh bawk a ni. Tun season-ah inelna hrang hrang match 11 an khelh tawhah Red Devils hian vawi hnih chauh hnehna an la chang a, mahse hetiang dinhmun hnuaiah pawh hian manager dang thlak thuai thuai lo turin McCarthy chuan a chah a ni.
South Africa chanchinbu Sporty TV nena an inkawmnaah, United hian Carrick hi an chelh zui zel tur a ni em tih an zawhna chu McCarthy chuan chhangin: "Aw, chutiang chu ka ngaihdan a ni chiang mai. Ani chu manager la naupang tak a ni a, tunah hian inthlak pawh ni ula a aiah tu nge in lakluh chuan ang? Manager ṭha tu nge awm chuang?
"Ka ngaihdan chuan Man United tana manager ṭha ber leh ka hmuh chak ber chu Luis Enrique a ni a, mahse ani chuan PSG a chhuahsan dawn lo hrim hrim. A chhuahsan dawn lo chiang sa a, a dinhmunah khan ding ta ila keipawhin ka chhuahsan bik lo ang. PSG-a thil a din tawh sa kalsana Man Utd rawn pan tur chuan mi â a nih a ngai ang," tiin a sawi.
Ten Hag-a hnuaia a thawhpui ṭhin defender Lisandro Martinez-a'n club thuneitu (board) lamin thil an kalpui dan a sawisel chungchang pawh McCarthy hi an zawt a. United defender hian club chhungrila harsatna awmte phawrhchhuak tura dinhmun ṭha bera ding a nih thu sawiin a thlawp tlat thu a tarlang.
McCarthy chuan, "Player-te chu nitin khelmualah an awm a, keini hmuh theih bak thil tam tak an hmu a ni. Keini chuan match khelh ni chiah kan hmu a, anni erawh chu nitinin an awm a, eng nge siamṭhat ngai tih an hria a, chu chu sawichhuak thei dinhmun ṭha berah an ding a ni.
"Club tana ṭha ber a duh vanga sawi a ni a, rilru thianghlim tak pu chunga sawi a ni tih ka ring tlat bawk. Training-a a chet dan in hmuh chuan player zawng zawng hian amah anga rilru puthmang (mentality) nei vek se in ti hial ang. Rilru puthmang dik tak a nei a, team tichhe thei tur thil engmah a sawi ngai lo ang a, team ṭanpui a duh vang chauh a ni. Team an lo chak zual a, thil siamṭhat ngai an siamṭhat a, Manchester United ṭha ber a rawn lanchhuah theih nan a sawi a ni," tiin Martinez chu a chhan tlat a ni.
Board a sawisel hnu chiah hian Michael Carrick chuan match dawtah Martinez hi bul a ṭantir zui tho va, mahse he Argentine defender hian hliam tuarin Leeds United an hmachhawn ṭumin half-time-ah lakchhuah a ngai ta a ni.
