Manchester United-in season bul an ṭan ṭhat loh em avangin head coach Michael Carrick-a chungah pressure a sang chho hle a. Inkhelh rahbi a chhiat bakah, squad chhungah senior player inenkawlna hmun pawimawh ṭhenkhat a tlahniam hle a ni.
He team tana buaipui awm ber pakhat chu left-back position a ni a. Luke Shaw chu kar tin khel tura beisei theih a nih loh laiin, squad-ah senior left-back dang awmchhun a ni mek a ni. Harry Amass chuan tun season-ah first-team tan minute 29 chauh a la khel a, a aiawh turin right-back leh centre-back-te hmanga hnawhkhat hram hram a ni ṭhin.
United academy lamah left-back thahrui thar Diego Leon a awm ve mek a, ani hi nipui liam ta khan Paraguayan club Cerro Porteno aṭanga an lakluh a ni. Kum 19 mi Leon hi Adam Lawrence-a enkawl U21 squad-ah inthlanrem tumin a la buai mek a, senior team tana debut siam a la nghak reng a ni.
Left-back lamah United-in harsatna an neih meklai hian, Leon hi first-team hnaihah a la awm meuh lo. Mahse he rawlthar kum 19 mi tan hian hun a la tam hle a, academy-ah hmasawn zelin a inbuatsaih mek a ni.
A hmasawnna tihchak nan leh senior football hmel hmuh a duh avangin, Leon hian January transfer window inhawng turah loan-a chhuah a duh hle a ni. United hian season tin player tam tak loan-in an chhuah tir ṭhin a ni.
A agent Renato Bittar chuan 730 AM (El Nacional kaltlangin) hnenah January thla hian Leon hian United chhuahsana loan-a chhuah a tum hle thu a sawi. Bittar chuan, "A inhmachhawn theihna tur leh inkhelh hun ṭha a hmuh theihna tur team-ah loan-a chhuah a, chumi hnuah Manchester-a kir leh a ni a tum ber," tiin a sawi.
Leon-a pan theih tur hmun hrang hrang sawiin, Bittar chuan Championship, League One emaw Europe-a league dang dante a tarlang a. Leon hian South America-a kir leh aia Europe-a cham chhunzawm zel a duh zawk a ni. League One lamah pawh chhuak dawn se, kar tin bul a ṭan ziah theih dawn chuan he rawlthar tan hian a ṭangkai em em dawn a, English football boruak hriat chian nan pawh a tana thil pawimawh tak a ni ang.
First-team-a inlan theihna kawng chiang tak a awm a nih loh chuan, January-ah he Paraguayan tlangval hian loan hmangin Old Trafford a chhuahsan rih a rinawm hle a ni.
