Manchester United manager thar a nih theihna hun ṭha a awm a nih chuan Newcastle United leh Bournemouth boss hlui Eddie Howe chuan he hun ṭha hi um zui nghal chawt se an duh. Bournemouth winger hlui Marc Pugh-a sawi danin, United-in head coach Michael Carrick an ban a nih chuan Howe hi Old Trafford lam pan turin a thlawp hle a ni.

Tun season-a United-in bul an ṭan chhiat em avangin manager Michael Carrick hian pressure lian tak a hmachhawn mek a. Red Devils hian 2026-27 campaign-ah inelna hrang hrang game 11 an khelh tawh zingah vawi hnih chiah hnehna an la chan a ni. Premier League-ah point 21 hmuh theih aṭangin point 7 chauh an hmu a, Carabao Cup-ah Brighton & Hove Albion hneha hnawhchhuah an ni tawh bawk a, Champions League table-ah pawh match 3 khelhah vawikhat chak tawhin 20-na dinhmun an luah mek a ni.

Thla liam taa Sabah 4-0 a an hneh hnu aṭangin United hian a zawnin match 7 chhung hnehna an la chang leh lo a. Nilaini khan Cesc Fabregas-a enkawl Como lakah 4-1 ngawta an tlawm tak avangin Carrick-a dinhmun a derthawng takzet ta a ni.

Heti a nih rual hian, Pathiannia mahni mual Old Trafford-a Bournemouth an hmachhawn turah chuan Carrick hi team enkawl tura engemaw chen la chhawr zui beisei a la ni a. United hotute chuan Middlesbrough boss hlui hi dinhmun siamṭha turin hun pek rih an la duh a ni.

Mahse Carrick hi an ban tak thut a nih chuan, a thlaktu tur zingah Howe hi a rinkai berte zinga mi a ni. Kum 48 mi Howe hi kumin nipuia Newcastle United a chhuahsan hnuah contract nei lovin a awm mek a, United nena sawizawm a lo ni tawh ṭhin bawk a ni.

Bournemouth-a Howe-a lo enkawl tawh ṭhin Pugh chuan talkSPORT-ah chanchin sawiin: "Kei hi Eddie ni tlat ila chuan, he hun ṭha hi ka bawh zui nghal chawt ang. A nihna takah chuan United hian Eddie ang mi hi an mamawh nia ka hriat avangin a ni... Hetiang hna ṭha hi a thleng fo lo a, khawvela club ṭha berte zinga mi a ni bawk a; ka ngaihdan chuan hun ṭha hi um zui nghal chawt tur a ni," tiin a sawi.

Manchester United striker hlui Dwight Yorke pawhin Carrick-a thlaktu atan Eddie Howe hi mi langsar berte zinga mi a nih thu a sawi ve bawk.

Keys & Gray Unleashed podcast-a a sawinaah Yorke chuan: "Eddie Howe-a chanchin hian mi tam tak ngaihven a hlawh hle ang. Bournemouth leh Newcastle-a a thil lo tih tawhte enin, tawnhriat hnem zawk a nei tawh hrim hrim a ni.

"Howe hi tun dinhmuna manager langsar ber zinga mi a ni. Contract nei lovin a awm mek a, hna a zawng mek bawk. Manchester United fan-te leh mipuite phurruak siamsak thei tur manager ṭha ber ber dang thlan tur an awm bik lo a ni," tiin a sawi bawk.