January transfer window a hnaih chhoh mek laiin, Manchester United goalkeeper hlui David de Gea-a hmabak chu a chiang lo hle.
Kum 2011 nipui khan he Spaniard hi Old Trafford-ah a lut a, khawvela goalkeeper ṭha berte zinga mi a rawn ni chho ta a ni. Sir Alex Ferguson-a chawlh hnua Red Devils manager lo awm chho te dinhmun lo cet-tu leh team chhanchhuaktu ber a ni a. Old Trafford-a kum 12 a awm chhungin De Gea hian Premier League title (2013), Europa League (2017) leh ram chhung nomawi lian zawng zawng a chawi vek a ni. Hei bakah hian Premier League Golden Glove lawmman vawi hnih a dawng a, a season hnuhnung ber (2022/23)-ah pawh a dawng hial a ni.
Mahse kum 2023 khan Old Trafford-a a hun hman chu boruak duhawm chiah lovin a tawp a, a contract chu pawtsei lovin a tawptir a ni. United manager hlui Erik ten Hag-a'n a tirah thlawp viau mah se, a rilru thlakin Andre Onana a la ta zawk a ni. Club nei lova kum khat zet a awm hnuah, August 2024 khan Serie A club Fiorentina chuan De Gea hi an lalut ta a ni. Kum 35 mi hian kum khat contract ziakin, kum khat dang pawhsei theihna option a tel a, chu chu a hnuah hman chhunzawm a ni. De Gea hi La Viola tan a rawn inlan ṭha nghal hle a, a bikin Europe inelna lamah a che ṭha em em a ni.
Mahse, tun season-ah a chet ṭhatna a tlahniam ta hle a, Italian chanchinbu Gazzetta dello Sport chuan a hmabak chungchangah Fiorentina-in thutlukna lian tak an siam tak thu an tarlang. Report tarlan danin, Serie A club hian tun campaign tawpah he goalkeeper tawn hriat ngah tak hi kaltir zawk an rilruk mek a ni.
De Gea-a contract hi June 2027 thleng daih a la ni a, mahse Fiorentina hian a contract hi a hun hmaa tihtawpsak (terminate) an ngaihtuah mek a ni. Tun hnai chhawrhnaa goal awlsam tak tak a chhuah ngun avangin Fiorentina hotute hi De Gea-a chet danah an lungawi lo hle nia tarlan a ni.
Nakkum nipuiah Fiorentina hian an squad siksawi nasat an tum mek a, De Gea hi chhuak tur zinga langsar ber a ni maithei. La Viola hian a thlaktu tur an zawng ṭan tawh a, Atalanta goalkeeper Marco Carnesecchi leh Monza goalkeeper Stefano Turati te chu an mit fukna ber an ni mek a ni.
