November international break a hnaih chhoh meklai hian Manchester United head coach Michael Carrick-a hmakhua a la chiang lo hle.

Match zawnin vawi riat ngawt hnehna an chang tawh lo a, INEOS pawhin Carrick-a laka an rinna an hloh tial tial avangin a thlaktu tur zawn hna an ṭan tawh nghe nghe. Mahse, a thlaktu tur hmunruak luah thei tur duhthusam an la hmuh mai loh avangin English manager hi chawlh tir a la ni rih lo a ni.

Player ṭhenkhat pawh an lungawi lo hle a, an captain Bruno Fernandes phei chuan Carrick-a tactics chungchangah a lungawilohna a lo sawichhuak tawh a ni. Chutih rualin, tun dinhmunah chuan Carrick-a'n Manchester United hi a enkawl zui zel rih dawn a, Stamford Bridge-ah Chelsea an luhchhuah pui ang. Dinhmun hrehawm tak aṭanga harhchhuak leh tur chuan Carrick hian a player ṭha ber berte a mamawh hle dawn a ni.

Fernandes hi United player langsar ber leh hmingthang ber ni mah se, tun season chhunga an chet dan thlirin kum 21 mi Kobbie Mainoo hi an player ṭha ber leh rintlak ber a ni meuh mai. He England midfielder hi season liam ta pawh khan Carrick-a midfield lailiah mi pawimawh berte zinga mi a lo ni tawh a ni.

Fabrizio Romano-a tarlan danin, hliam avanga hun engemaw chen a chawlh hnuin Mainoo hi first-team training-ah a rawn kir leh tawh a, Chelsea nena an inkhelh turah a inlan thei tawh dawn a ni. Romano chuan Mainoo hian Carrick hi a "ngaina em em" a, a manager tana ṭang tlat leh fight chhuahpui a duh thu a tarlang. Italian journalist hian Carrick-a rawn thlen hma khan he academy graduate hi January thla khan loan-in "chhuak mai tur" a nih tawh avangin, Carrick-a rawn thleng hian Mainoo-a "career a chhanchhuak" tiin a tarlang bawk.

Mainoo-a chawlh chhung khan Carrick-a tan thil a harsa hle a, Como laka an tlawm hnua Fernandes-a ṭawngkam hman avangin manager tan rilru buai a belhchhah hle. Bournemouth laka 3-0 a an tlawm ṭum khan Carrick chuan Fernandes hi a hmang lo thak a, Old Trafford-ah hian minute khat pawh khelhtir lovin bench-ah a ṭhut tir a nih kha.

Mahse Romano chuan, Carrick leh Fernandes te hi a hmaichhan ngeia an inbiak hnuah Chelsea lakah Fernandes hi a rawn kir leh tawh beisei a ni tih a sawi. Portuguese midfielder leh Mainoo te hi season liam ta anga an rawn inkawp leh a, an che ṭha leh a nih chuan, United hi tun thla tlemte chhunga an dinhmun aiin an ṭha chho ngei ang.