Subway Players Cup inkhelah Manchester United chuan Burnley chu 3-0 in an hneh a, he match-a che ṭha em em forward Lea Schuller-i chet dan chu United head coach Eva Olid chuan a fak hle.
He inkhelah hian mualneitu United hian Burnley tlarhnung khawng tak an hmachhawn a, mikhual lam hian an tlarhnung phui tak (low block)-a khawrhin United nawrna chu an lo dang ve ṭang ṭang a ni. Mahse, minute 29-naah Burnley goalkeeper tihsual chuhin Ellen Wangerheim chuan United tan hma hruaina goal a khung ta nge nge a. Second half lamah Schuller chuan goal hnih mawi tak rawn khung chhunzawmin, United tan hnehna a nemnghet ta a ni.
He hnehna hian United tan thil ṭha tam tak a thlen a. Inelna hrang hrangah tlawm nei lova an kal tluan theihna chu match kua (9) ah an pawtsei chho a, hemi bakah hian hliam leh chhan dang vanga chawl rei tawh player pawimawh eng emaw zatin khelmual an rawn rap leh thei bawk a ni.
Naute a neih avanga kum khat chuang chawl tawh Celin Bizet Donnum chu khelmualah a rawn inlan leh a, ani hi June thla khan a nau a lo piang tawh a ni. Hemi rual hian hliam vanga hun rei tak chawl tawh Jayde Riviere leh Emma Watson te pawh an rawn kir leh tawh bawk.
Inkhelh zawha chanchinbumite a kawmnaah, kum 41 mi coach Olid chuan Schuller-i theihna chu fak hle chungin, Women's Super League (WSL)-a Everton an hmachhawn lehzel hunah pawh hetiang boruak ṭha hi chhawm nung zel turin a naute a fuih a ni.
Schuller-i chungchang sawiin Olid chuan, "Tun season chhung hian a inrintawkna a sang chho tial tial a, khelmuala a inlan apiang hian a hma aiin a ṭha zawk zel tih ka hria a ni. Chu inrintawkna nei chho tur chuan ṭanpui a ngai a, kan tan pawh a pawimawh hle a ni. Squad-a mi zawng zawng an khel ṭha hi a lawmawm a, inrintawkna an nei chho zel bawk a, Ellen leh kan striker te vanga ka hlim zia hi sawiin a siak lo," tiin a sawi.
Inkhelh kalphung chungchang sawifiah lehin Olid chuan, "Inkhelh kha a muang deuh a, tlarhnung khawng tak (low block) nena khel team hmachhawn chu a harsa ṭhin reng a ni. Tlarhnungah mi panga (back five) an dah a, a chhung thuk taka an tawlh luh tlat avangin an defence pawh tlang a harsa a, penalty box chhungah hmun awl zawn hmuh a har hle a ni.
"First half lam kha chu inkhel a muang deuh a, second half erawh a rang ta deuh a, sir lam aṭanga box chhunga ball vawrh luhna hmun awl kan hmu ṭan ta a, goal hnih dang khungin 3-0 in kan titawp thei ta a ni. Tharum leh tlan nasat lamah chuan inkhel khirh tak a ni a, mahse low block hmachhawn chuan a nih dan tur reng a ni. A tawpah chuan goal thum kan khung a, goal chhuah lovin (clean sheet) kan chak a, kan chet ṭhatna boruak kan chhunzawm zel a ni," tiin a sawi bawk.
Player rawn kir leh te chungchang sawiin Olid chuan, "Vawiina goal thum kan khung leh cup-a point kan hmuh piah lamah hian, hetianga player pathum an rawn kir leh hi a pawimawh ber a ni. Team tan an tangkai dawn hle tih ka hria. Match khelh tur kan ngah a, squad chhungah inelna a sang hle a, anni pathum tan hian ka lawmpui takzet a ni," a ti.
Second half-a hliam vanga an lakchhuah Scarlet Hill-i dinhmun erawh a la chian loh thu Olid chuan sawiin, "Thuthar engmah a la awm lo a, a chawn a nih ka ring a, mahse ngun takin kan enfiah phawt a ngai dawn a ni," a ti.
United manager chuan tlip chhunzawmin, "He match hian phurna min thlen hle a, mahse Inrinni-ah kan inthlahdah thiang lo, league-ah Everton kan hmachhawn dawn a ni. League inelnaah chuan engpawh a thleng thei a, tupawh hmachhawn a harsa vek. Inrinni atan hian rilru kan sawrbing takzet a ngai dawn a; amaherawhchu player ṭhate an rawn kir a, striker-ten goal an khung a, goal kan chhuah lo bawk a, hengte hi Inrinni atan chuan thil lawmawm leh pawimawh tak a ni," a ti bawk.
Manchester United hi tun kar tawpa WSL fixtures an neih hma hian league table-ah palina (4-na) dinhmun an luah mek a ni.
