Manchester United goalkeeper Andre Onana-a man chu an club lamin an bithliah tak avangin, he Cameroon international goalkeeper lakluh tum hian Turkish club lian Galatasaray leh Trabzonspor te an inchuh chho mek a ni.

Trabzonspor hian Onana hi tun season chhung atan loan-in an lalut mek a, season liam a, season thar inṭan hma ngeia a loan contract hi a ngheta chantir tumin hma an la mek a ni. Turkish-Football thudawnna chuan Trabzonspor hotute hian he Cameroon international hi an club-ah chelhhlen zel an tum hle tih an tarlang.

Hemi hnu hian Galatasaray pawh he dawrnaah hian an rawn inrawlh ve ta a. Istanbul club hian an goalkeeper rinrawl Fernando Muslera thlaktu tur hnam dang goalkeeper ṭha tak lakluh an duh a ni. A tirah Galatasaray hian Manchester City goalkeeper Ederson chu lakluh an lo tum tawh a, mahse an inbiakna hi a khirh tak avangin inremna an siam thei ta lo a ni. Chutichuan, Turkish club hotute hian Manchester United goalkeeper Onana lamah an mit an len ta zawk a ni.

Manchester United lam pawhin Trabzonspor-a loan-a a khelh chhung hian Onana hi a chet ṭhat em em an beisei a. A khelh ṭhat viau chuan nakkum nipui (2026) transfer window-ah man to takin hralh an inbeisei thu tarlan a ni bawk. Old Trafford club hian he goalkeeper hi a man to taka hralh chhuah leh an tum nia sawi a ni.

Trabzonspor-in he Cameroon goalkeeper hi a ngheta lakluh tura theihna zawng zawng an chhuah mek laiin, Galatasaray tan pawh Muslera thlaktu tur lakluh a ṭul em avangin he inchuhna hi a hmuhnawm chho hle dawn a ni. Turkey ramah hian Onana hian a hmakhua a humhim zui thei ang em tih leh club eng zawk hian nge Manchester United man phut pe ngam a lalut ta ang tih chu transfer bazar thara hriat a ni ang.