Bournemouth laka mahni mual Old Trafford-a 3-0 ngawta an tlawm hnuah, Manchester United head coach Michael Carrick chuan club hotu lu Omar Berrada leh Jason Wilcox te nen an inbiak thu a sawichhuak a, mahse hna aṭanga hnawhchhuah a ni dawn leh dawn loh erawh a hriat loh thu a sawi.

United hian tun season bul an ṭan chhia hle a, Cherries (Bournemouth) laka Old Trafford-a an tlawm tak avang hian inelna hrang hrangah a zawnin match riat (8) chhung hnehna an chang tawh lo a ni. Inelna hrang hrang match 12 an khelh tawhah vawi hnih chiah hnehna an la chan tak avangin Carrick-a dinhmun hi a derthawng hle a ni.

Hei hi ni tlem te chhung zawnga an tlawm nasat vawihnihna a ni a, Champions League-ah Como laka 4-1 ngawta an tlawm hnuah hetiang hian an tlawm zui leh ta a ni. Kum 45 mi Carrick-a dinhmun hi hlauhawm takah a ding mek a, mahse inkhelh chhung zawng leh inkhelh hnuah Old Trafford-a pungkhawm United fan-te chuan an head coach hi thlawpna hla sa in an tan tlat thung a ni. Heti chung hian khelmuala an chet chhiat chhoh zel avangin a hna aṭanga peihchhuah a nih theihna dinhmunah a ding mek a ni.

Match zawhah chief executive Berrada leh director of football Wilcox te nen an inbe reng em tih an zawhna chhangin Carrick chuan, "Match dang ang bawkin, an rawn chhuk zawk a, thil pangngai lo leh thil danglam a awm lo," tiin a chhang.

United hian tun kar chawhma lamah match an neih loh avangin Chelsea an hmachhawn hmain inbuatsaihna hun an nei dawn a, he hun chawlh hian Carrick-a hmabak a tithengthawng hle a ni. Mahse he manager hian tlawm zawk nih pawm mai a tum lo a, ni tlem te chhungin hnawhchhuah a nih a inbeisei em tih an zawhna chhangin:

"Dinhmun awm dan hi ka hrethiam em em a ni. A hranpain engmah phei chu ka beisei lem lo. Ka hna hi pangngai takin ka chhunzawm zel ang a, he club hi ka hmangaih em em tih in hria. Thutlukna eng pawh siam nise, he football club tana ṭha ber tur chu ka ti zel ang. Chuvangin thil thleng turah engmah beisei ka nei lo.

"Mawhphurhna zawng zawng ka la e. Mawhphurhna ka la tih ka lo sawi tawh a, ka pawm thlap bawk a ni. Thil thleng tur reng rengah, kan chak a nih pawhin, kan tlawm a nih pawhin, kan inhnehtawk a nih pawhin, club chhunga thil thleng zawng zawngah mawh ka phur a ni. Hetiang dinhmun sang ka luah chhan hi he dinhmun hi ka zah vang a ni a, mawhphurhna pawh ka ta a ni. Tun dinhmunah hian eng dang nge ka sawi chuan chuan ang?" tiin a sawi.