Kumin nipui bazara Brighton aṭanga an lakluh hnuah, Manchester United ṭantute chuan an midfielder thar Carlos Baleba-a khelmual chhung chetla hmuh an nghakhlel tawh hle a. A kerek hliam avangin he Cameroon international hi khelmualah a la inlan thei lo a, mahse international break hmaa Fulham nen 1-1 a an inhnehtawk ṭum khan bench-ah a vawikhat nan dah a lo ni tawh a ni.
United tana a la inlan theih rih loh avang hian Baleba hi Cameroon squad-ah pawh koh a ni lo a. Mahse, kar thara Tottenham Hotspur an hmachhawn hunah United tana a competitive debut siam ngei tura beisei a nih laiin, Zirtawpni khan Carrington-ah mipuite hmuh lohva (behind-closed-doors) friendly match an khelhah a rawn inlan ve ta hlauh mai a ni.
Old Trafford-a thla hmasa lam a hman chhungin a team-mate tharte nel chhoh nan leh a kerek hliam enkawl dam nan hun a hmang a, Ineos neih tho Swiss club Lausanne-Sport lakah a vawikhatna atan United jersey hain khelmual a rap ta a ni. Carrington-a inkhelh chanchin hi tarlan tam a ni lo na a, United hian he match-ah hian 2-1 in hnehna an chang nia hriat a ni.
Baleba bakah hian first-team player dang eng emaw zat leh academy rawlthar ṭhenkhat an inlan bawk a. Chung zingah chuan Michael Carrick-a mit lak tum mek Paraguayan rawlthar Diego Leon pawh a tel a ni. Chu mai bakah, Switzerland-a loan-a season hnihna hmang mek Sekou Kone bakah Harry Maguire, Matheus Cunha leh rawlthar Amir Ibragimov te pawh an inlan bawk.
He friendly match hian kumin nipuia Lausanne-Sport zawmtu, United academy chhuak Tyler Fredricson tan pawh Carrington-a a club hlui hmachhawn theihna hun remchang a pe bawk a ni.
International break chhunga ram tana chhuak ve lo player-te tan chuan head coach Michael Carrick-a ruahmannaa tel ve theih nana an fitness tihhmasawnna hun ṭha tak a ni a. Carrick hian team inkhelh dan leh dinhmun siamṭhat a mamawh hle a, Tottenham an hmachhawn hunah pawh mipui mit fukna ber tur chu Carlos Baleba hi a ni ngei ang.
An hmachhawn Lausanne-Sport hi Swiss Super League-ah match 9 khelh tawhah vawikhat chiah chakin, vawi thum an inhnehtawk a, vawi nga tlawmin table mawngphahah an ṭhu mek a ni.
