Manchester United midfielder Carlos Baleba chuan Old Trafford mualah club tana a match hmasa ber a khel ta a, amah beiseina sang tak awm mah se team chu hnehna a chanpui zo ta bik lo a ni.
Manchester United buaina hi a thuk hle a, manager Michael Carrick pawhin chinfel dan tur zawn hmuh tumin a la buai hle. Carlos Baleba hi he harsatna sukiangtu zinga mi chu ni thei mah se, amah chauhva buaina zawng zawng chinfel vek theih erawh a ni bik lo.
Nipui lai khan Baleba hi Brighton aṭangin £65 million-in an la a, Old Trafford-a Tottenham nen 1-1 a an inhnehtawk ṭum khan minute 59-naah bench aṭangin a rawn lut a, club tana a inlan hmasak ber a siam ta a ni. He midfielder hian a debut match khelh zawh hnuah a rilru awm dan phawrhchhuakin a ṭawngchhuak ve ta bawk.
Instagram lama a thuziakah Baleba chuan, "Kan duhthusam ang result erawh a ni lo, mahse ka debut siam theihna hi ka mumang a taka thleng a ni e. Min lo lawmna avangin fan-te zawng zawng chungah lawmthu ka sawi a. Hetah hian ka awm thei hi ka hlim takzet a ni," tiin a tarlang.
Tottenham laka United draw kha hlawkna leh thil lawmawm hmuh tur a awm meuh lo a ni. Michael Carrick-a naute kha inkhelh thunun hneh loh niin, match an hloh lo kha an vannei zawk hial a ni. Hetiang karah hian Carlos Baleba-a rawn chet dan erawh beiseina tlemte lantirtu a tling thung. Hun reilote chhung chauh khelmualah hun hmang mah se, Brighton player hlui hian theihna a nei ṭha hle tih a pholang a, ball a thunun thiam bakah huaisen takin tlar hma a nawrpui thei a ni.
MUTV lamah pawh Baleba-a thawhrimna hi fakin chawimawi a ni a, fan-te pawhin a khelh dan chu an fak hle bawk. He match-ah hian Youri Tielemans chu Baleba-a aiah bul ṭantir a ni a, mahse Kobbie Mainoo nena an inkawp dan erawh a fuh tawk lo va, United midfield chu nawr darh a ni fo bawk a ni.
Tunah chuan zawhna lian ber chu Baleba-a taksa fit tawk tawh em tih hi a ni ta. Kar thara khualmuala Leeds United an hmachhawn hunah bul a ṭan thei tawh ang em, chumi hma chiaha Atletico Madrid nena an inkhelh turah pawh engtin nge a dinhmun a nih dawn tih chu thil hriat chakawm tak a ni chho mek a ni.
