Manchester United captain hlui Ashley Young chuan khelmuala lu hmanga ball tauh thiam ber thlan chungchangah Liverpool defender Virgil van Dijk chu a dah hniam deuh a, an player hlui Casemiro chu a ṭha zawk daih niin a sawi chhuak.
Kum 2018-a Southampton aṭanga Anfield a pan aṭang khan kum 35 mi Netherlands international Van Dijk hian Liverpool tlarhnungah nghawng lian tak a nei a. Mahse tun hnaiah erawh a theihna a tlahniam ve deuh nia hriat a ni. Chuti chung chuan Celtic leh Southampton defender hlui hi khawvela centre-back ṭha berte zinga mi a nihna chu phat rual a ni lo.
Overlap Daily TikTok video tharah kum 41 mi Ashley Young hi footballer famkim din tur (build your perfect footballer) a ngen a ni a, heta player theihna hrang hrang thlan tur zingah lu hmanga ball tauh thiam (heading) a tel a ni. Young-a'n thlan tur a ngaihtuah buai lai takin mi ṭhenkhat chuan Virgil van Dijk-a hming an lo rawt a, mahse United skipper hlui hian a pawm lo chiang hle.
Young chuan, "Tunge ball tauh thiam ber chu le? A teuh lo mai [Van Dijk-a tan hun a awm lo]. Van Dijk maw? Casemiro ka thlang zawk ang," tiin tlang takin a sawi a ni.
Van Dijk hi Liverpool tan tlarhnung venhim lamah leh tlarhma lama tauh luh kawngah boruakah a chungnung thei hle ṭhin a. Mahse Casemiro pawh boruakah a che ṭha tawk hle a, Real Madrid star hlui hian season liam ta khan Manchester United tan lu hmanga goal khung kawngah a theihna sang tak a pholang a ni.
Kum 34 mi Brazilian midfielder hian Old Trafford-a a season hnuhnung berah khan Premier League-ah lu hmangin goal riat (8) ngawt a khung a. Van Dijk thung chuan 2025-26 campaign chhung khan Premier League-ah lu hmangin goal 5 a khung a, inelna hrang hrang chhiar telin goal 7 a tauh lut thung a ni.
FotMob statistical data tarlan danin, Van Dijk hian tun season chhungin Liverpool tan lu hmangin goal a la khung lo va, mahse tun kar hmasa maia Nations League-ah Greece nen 2-2 a an inhnehtawk ṭum khan Netherlands tan lu hmangin goal a khung a ni. Casemiro ve thung chuan Inter Miami a zawm hnuah tlarhma lamah a hlauhawm zia chhunzawm zelin, MLS club tana a luh hnu hian lu hmangin goal li lai a khung leh tawh bawk a ni.
Old Trafford-a a awm lai khan Casemiro hian an captain Bruno Fernandes nena an inthlunzawmna chu a chhawr ṭangkai hle a, Champions League vawi nga la tawhtu hian United set-piece aṭangin hlauhawm a siam fo ṭhin a nih kha. Tunah chuan he Brazil captain hlui hian Bruno Fernandes-a aiah Lionel Messi a thawhpui tawh thung a, Inter Miami pawhin boruaka Casemiro-a hlauhawmna chu an chhawr ṭangkai chho mek hle a ni.
Season liam ta tawpa United nena an contract a zawh hnuah, Casemiro hian Sir David Beckham-a club Inter Miami hi free agent-in a zawm a, US-a a insawn hnu hian match 15 a inlan tling tawh bawk a ni.
