Manchester United chuan an tlarhnung thuamchak an tumna kawngah AC Milan centre-back Koni De Winter lakluh an rilruk mek nia puan a ni.

Nipui transfer pahnih liam ta chhung khan United hian an tlarhma leh tlar laili te lo thuamchak tawhin, kum 2027 chhung hian an tlarhnung (backline) thuamchak ve thung chu an ruahman ber a ni ta a. INEOS pawhin tun season-a an tlarhnung che chhia tihbaiawm tak siamṭha tur hian quality nei ṭha defender lakluh hi an dah pawimawh ber beisei a ni.

Tun season chhung hian Red Devils te hian clean sheet an la nei miah lova, goal an chhuah tam takte pawh an tlarhnung tlin lohna leh tihsual aṭanga rawn chhuak a ni ber. Hemi avang hian thutlukna khauh tak siam a ngai dawn a, Lisandro Martinez pawh club chhuahsan tur anga sawizawm mek a ni a. Hemi rual hian Harry Maguire leh Luke Shaw te pawh, an contract tawp tur a nih hmain United-in contract kum khat pawhsei theihna (one-year option) an hmang a nih loh chuan Old Trafford an chhuahsan ve maithei bawk a ni.

Chutiang dinhmun a awm mek laiin, INEOS player lakluh duhte list-ah AC Milan defender Koni De Winter hming chu a rawn ri chhuak ta a ni. Daily Briefing column-a Mark Braus-a tarlan danin, "Liverpool, Manchester United leh Chelsea te chu tun season-a Serie A-a rawlthar che ṭha berte zinga mi [Koni De Winter] lakluh tumtu langsar ber ber an ni," tiin a ziak.

He Belgium international hian Serie A-ah hma a sawn em em a, AC Milan manager Ruben Amorim-a team-ah hmun pawimawh chang char char player a ni. Amorim-a'n De Winter hi a ngaihven em em chhan pawh pressure hnuaiah pawh ball thunun thiam tak, 95 per cent zet pass hlawhtling nei thei a nih vang a ni. Hei bakah feet 6 leh inches 4 a sang a nih avangin boruakah a chungnung hle a, taksa leh thluak chet ranna hmangin hmun awlah pawh khingpuite a zui zut zut thei a ni. Hetiang player hi manager zawng zawngte duhthusam a ni a, United tan pawh tlarhnung thuamchakna tur player ṭha tak a ni ang.

Manchester United-in De Winter lakluh hi thutak taka an buaipui beisei ni mah se, Old Trafford pana an lakluh theih nan Liverpool leh Chelsea te nen transfer intsiansiakna khirh tak an hmachhawn a ngai dawn a ni.