Manchester United defender Harry Maguire chuan manager hmingthang Sir Alex Ferguson-a'n Old Trafford-a mawhphurhna a lakluh kum 40-na chhinchhiahna thlen denchhenin, an pahniha inlaichinna bik leh danglam tak an neih chungchang a sawichhuak ta.
Sir Alex-a'n Aberdeen chhuahsan a, Southampton laka League Cup third round replay-a an tlawm hnua ban tak Ron Atkinson-a hmunruak luaha United manager atana ruat a nih aṭangin kum 40 zet a liam ta a ni. A tir lamah dinhmun harsa tak hmang nghal mah se—Oxford United laka 2-0 a an tlawm bakah Norwich nen 0-0 in an inhnehtawk a—kum 1990-a FA Cup nomawi an chawi aṭang khan United chu English leh European football-a lalber zinga mi ni chho turin a kaihruai ta a ni.
Kum 26 chhung mawhphurhna a chelh chhungin nomawi lian 38 ngawt a chawipui a, chung zingah chuan Premier League title 13, FA Cup 5, League Cup 4, Champions League 2, European Cup Winners' Cup 1, UEFA Super Cup 1, Intercontinental Cup 1 leh Community Shield vawi 10 te an tel a ni. He kum 40-na chhinchhiahna atan hian kumin kar tawp hian Old Trafford-ah zanriah buatsaih (special dinner) neih ruahman a ni bawk.
Club media hnenah Maguire chuan Sir Alex nen hian inchhirin inbiakna an nei ngun hle tih a tarlang. Kum 2011 FA Youth Cup final-a Sheffield United tana a khelh lai khan a vawikhat nan Sir Alex nen hian an inhmelhriat ṭan a ni. Kha match-ah khan Maguire hi a luah hliam na tak a tawrh avangin minute 35-na velah mual aṭanga zawn chhuah a ngai a, damdawi in lam panpui nghal a ni. Hemi hnu kar tlemteah Sir Alex-a ngei kutkhih (signed letter) lehkha thawn a dawng ta hlauh mai a ni.
Hemi chungchang sawiin Maguire chuan, "Match kha a rawn thlir a, ka lu a hliam na avangin hospital-ah min hruai nghal a. Kar tlemte hnuah Sir Alex-a hming ziah ngei Manchester United lehkha thawn ka dawng ta a. Ani leh club lam aṭanga thil mawi tak a ni a, a zahawm zia leh club ropui zia lantirtu a ni. Ka damchhungin ka theihnghilh tawh ngai lo ang. Sheffield United-a ka khelh lai khan Sir Alex hi mi tin tana entawn tlaktu tak leh kawnghruaitu a ni a, a takah phei chuan inbiak pawh rual loh nia ngaih a ni ṭhin. Chuti chunga a lehkha thawn ka dawng ta mai kha ka tan thil hlu leh pawimawh tak a ni a, lehkhaa min chawkphurna thu a ziahte khan keimahah inrintawkna min neihtir nasa em em a ni," tiin a sawi.
Maguire chuan sawi chhunzawmin, "A hnuaiah hian khelh ve ka chak em em ṭhin a ni. Tunah phei chuan kan inbe reng ṭhin a, ka theih ang angin a hnen aṭangin thurawn leh meizial fawp zawngin thu pawimawh ka la ṭhin. Mi ngaihtuah em em mai a ni a, thil a kal sual chang pawhin min rawn be ziah a, thil a kal ṭhat chang pawhin min rawn be ziah bawk. Manager a ni tawh lo chung pawhin he club-ah hian hmun pawimawh tak a la luah reng a ni. A hmel i hmuh emaw a ṭawng ka i hriat hlek pawhin a boruak thleng (aura) leh hma lam pan nana phurna a rawn thlente hi a ropui em em a ni," a ti bawk.
"Midangte ṭawngkam leh pawn lam boruak hawp lo tura intichak a, hma lam pan zel turin min hrilh ṭhin. Kum riat chhung club-a ka awm chhung hian vawi tam tak kan inbe tawh a, ka tan thurawn min pe reng ṭhin. Khawvela manager ropui ber a ni a, match apiang mai hi rawn thlir a, min thlawp hi a lawmawm hle a ni. Club chanchina hmun pawimawh tak luah kumkhua tur a ni a, he club-a rawn inlan zui zel tute tan pawh chawkphurtu lian tak a ni reng a ni," tiin a sawi.
Maguire leh a team-mite hi Pathianniah Aston Villa hmachhawn turin an inbuatsaih zui leh nghal ang.
