Real Madrid chuan Manchester United-a rawlthar theihna ngah tak, kum 16 mi forward JJ Gabriel lalut turin a thuphungin (verbal agreement) inremna an neihpui ta a, January transfer window-ah Bernabeu pan tir an tum niin Sky Sports leh David Ornstein te chuan an tarlang.
United tan he thil thleng hi thil pawi tak a ni a, academy-a a zirtirna man (training compensation) atan £100,000 vel chauh an hmuh dawn avangin, an rawlthar award lo dawng hnem tak hi man nei mumal lovin an chhuah tir a ngai dawn takngial a ni.
Gabriel hian September thla khan Old Trafford chhuahsan a lo dil tawh a, a aiawhtute chuan United register aṭanga paih nghal a, free agent a nih theih nan pressure an nawr a ni. A nu leh pate aṭangin EU passport a neih theih avangin, FIFA dan hmun awl (loophole) hmangin Europe-a club engpawh hi professional contract a ziahpui thei a ni.
PSG, Barcelona leh Bayern Munich te pawhin he rawlthar hi lakluh tum hle mah se, Gabriel-a camp hian Real Madrid-ah first-team pan chhohna kawng a fiah ber nia an ngaih avangin Los Blancos zawm hi an thlang ta zawk a ni. United hian an zirtirna man tlem te chauh hmuh hi pawm mai an tum lo va, sum tam zawk an hmuh theih nan dan hmanga khing let (legal action) an tum hle bawk. Mahse, Gabriel-a camp lam erawh chuan he khing letna hi an ngaihtuah zui vak lo niin a lang.
Kum 16 mi hian youth level-ah hlawhtlinna lian tak a lo nei tawh a, May 2026 khan Premier League Under-18 Player of the Season atan thlan niin, league match 21 a khelhah goal 20 ngawt a lo khung a ni. Hemi bakah hian United chhungril award ropui Jimmy Murphy Young Player of the Year 2025/26 pawh a la a, he award la thei naupang ber a ni hial a ni.
United chanchina first-team-a inlan thei naupang ber ni tur anga ngaih a nih laiin, a chhuak ta mai hian INEOS leh Wilcox-a te ruahmanna hnuaia youth pathway chungchangah zawhna lian tak a chhuah phah ta a ni. Kumin season inṭan tirah pawh Gabriel hian a theihna a lantir nghal zaih a; Europe youth competition-a a match hmasaberah United-in Sabah 5-0 a an hneh ṭum khan hat-trick a khung nghe nghe. Tunah chuan January thlaa he transfer hi tihpuitlin a nih hmain FIFA pawmpuina a ngai phawt dawn a ni.
