Manchester United academy player hlui Devonte Redmond chuan Old Trafford-a an awm laia a teammate, first-team inhlangkai zo ta lo Callum Gribbin-a chungchang sawiin mak a tih thu a phawrhchhuak a, Chelsea star Cole Palmer-a khelh dan nen a tehkhin hial a ni.

Kum 2010 chho vel khan Devonte Redmond hi Manchester United under-18 team-ah a awm ṭhin a, kum 2018 khan club hian an chhuah zalen (release) ta a ni. He winger hlui hian United senior team leh ram aiawh hial tling khawpa hlawhtling zui ta Marcus Rashford leh Scott McTominay te nena youth team khata khel ho ṭhin an ni.

Mahse, heng player hmingthangte nena khel dun ṭhin ni mah se, Redmond chuan an rualpui zingah khan Callum Gribbin chu langsar ber leh theihna nei sang ber a nih thu a la ring nghet tlat a ni.

Louis van Gaal-a'n Manchester United manager hna a chelh lai khan Gribbin hian United youth team-ah theihna sang tak lantirin mi tam tak mit a lo la tawh ṭhin a. England youth international lo ni tawh Gribbin hi attacking midfielder hlauhawm tak leh free-kick pet thiam em em mai a ni.

'More Than A Match' hnenah Redmond chuan Gribbin chu star player ni ngei tura a lo beisei ruk em em a nih thu sawiin, Chelsea star Cole Palmer-a khelh dan nen pawh a inang hle niin a sawi a ni.

Redmond chuan sawifiahin, "A thil tih theih ṭhin te kha a ṭihbaiawm zawk hial a ni, a kum rualpui te aiin a thiam zawk daih a, hah miah lova thil ti thei ang mai hian a khel ṭhin. Chak taka a sprint pawh ka hmu ngaiin ka hre lo, mahse chutianga tih kher chu a ngai ngai lo hrim hrim bawk a ni.

"Khelmualah taksa tha (physical) hmang uar tura nawr kan ṭan khan a khelh dan phung ṭhenkhat a hloh phah ta niin ka hria. Cole Palmer a awm hma daihin Cole Palmer ang chiah a lo ni tawh a ni.

"A theihna te, a technique, phili lo leh hahdam taka ball a khawih theihna leh thildang engkim mai kha a famkim a ni. Gribbin kha chu 'kalna tur hmun pakhat chiah a nei, chu chu United first team a ni' tia ka lo ngaih tlat ṭhin player kha a ni," tiin a sawi.

Devonte Redmond hi Scunthorpe United-ah loan-a a chhuah hnuin kum 2018 khan Manchester United chuan an chhuah zalen a, United academy-ah hian kum 13 ngawt hun a lo hmang hman a ni. United a chhuahsan hnu hian Salford City leh Wrexham tan te a khel zui a, Dubai lamah te pawh inkhel zuiin hun a hmang bawk.

Chutih laiin theihna sang tak nei nia an ngaih Gribbin pawh chu United first team-ah a inhlangkai thei ta bik lo va, kum 2019 khan United chuan an chhuah zalen ve ta bawk a ni.

Hemi hnu hian Sheffield United chuan lalut mah se, FC United of Manchester tana a khelh laiin a khup hliam na tak a tuar zui leh ta hlauh a. Tun hnai berah erawh Warrington Rylands tan a khel zui ve leh ta a ni.