Manchester United midfielder hlui Fred chuan Erik ten Hag-a player enkawl dan (man-management) a sawisel nasa hle a, Dutch manager hi squad-a player pawimawh hrang hrangte nen an intihthiam loh fo thu a sawi.
Kum 33 mi, Brazil international hlui (ram tan vawi 32 inlan tawh) Fred hian Charla Podcast-a a inlan ṭumin, Ten Hag-a'n amah, Cristiano Ronaldo, Casemiro leh Marcus Rashford-te nen inrem lohna an nei ṭhin tih a sawi a. Heti a nih rual hian, Ten Hag hi tactical lamah chuan a lo thawhpui tawh zinga coach ṭha berte zinga mi a nih thu a pawm thung.
ESPN-in a tarlan danin, Ten Hag-a chungchang sawi chhunzawmin Fred chuan, "Ten Hag hi tactics lamah chuan a ṭha em em a, mahse team enkawlna leh player-te a biak danah erawh mi ṭha tak a ni lo," tiin a sawi. Sawi chhunzawmin, "Khelhna hmun min pe duh ngai lova, a chang phei chuan a pik ṭhin hle. Player hrang hrang nen an inhnial fo a - keimah, Cristiano, Casemiro leh Rashford-te nen min inhnialpui a ni. Dutch player-te chauh kha a khelhtir ṭhin a, duhsak bik nei mi (clique-ridden coach) a ni. Mahse, tactics lamah erawh ka lo thawhpui tawh zinga ṭha berte zinga mi a ni thung," a ti.
Ten Hag leh Ronaldo te inkar chhiat chhan pawh sawiin Fred chuan, "Team kha phur tak leh chak taka tlan kual tura a duh laiin, Cristiano kha a lo upa ve tawh thung a. Ronaldo kha a thut tir (bench) a, chuvang chuan an inkar a chhia a ni," tiin a tarlang. Ronaldo leh Ten Hag te inkar a chhiat tak avang hian Portuguese star hian first team-a a hmun a chan loh hnuah, 2022 tawp lam khan club a chhuahsan ta a ni.
Ten Hag-a ai chuan Ole Gunnar Solskjaer-a'n dressing room a thunun dan leh player-te a inpumkhattir thiam dan a fak hle a, Solskjaer-a thawhpui assistant coach-te thawhhlawk zia pawh a sawi lang. Hemi bakah hian kum 2018-a United-a a vawi khat nan a laluttus leh Fenerbahce-a a lo enkawl lehtu Jose Mourinho pawh a fak hle a, Portuguese boss hi mipa hlimhthei tak leh "mi ṭha tak" a nih thu a sawi bawk.
Fred hian kum 2018 leh 2023 inkar khan Old Trafford-ah season nga a hmang a, Mourinho, Solskjaer leh Ten Hag-te hnuaiah a khel a ni. Season 2022/23-ah League Cup nomawi chawiin FA Cup final an thleng bawk. Ten Hag-a hnuaia a season hnuhnung ber a hman zawhin Fenerbahce a pan ta a ni.
Ten Hag-a hian Ajax-ah season li chhung nomawi chi hrang hrang a lo lakpui tawh a, Champions League semi-final a thlenpui tawh bawk. United-ah hian kum hnih leh a chanve awmin League Cup leh FA Cup-ah te champion-pui mah se, Premier League-ah erawh hmasawnna mawi tak a thlen chhunzawm pui thei lo. October 2024 khan league match pasarih a khelh aṭanga 14-naa an awm laiin ban a ni a, hei hi kum 1989/90 season hnu lama United season bul ṭan chhiat ber a ni.
