Real Madrid star Jude Bellingham chu Manchester United rawlthar JJ Gabriel-a'n Old Trafford a chhuahsan theih nana a rilru hmin chhuaktu zinga mi a ni tih tarlan a ni. Kum 16 mi rawlthar hmakhua tur chungchang hian thuthang tam tak a chhuahpui tawh a, Old Trafford a chhuahsan ngei dawn nia ngaihna pawh a lian hle a ni.

September thla khan Gabriel hian United chhuahsan leh a registration tihtawp a duh thu a lo sawi chhuak tawh a, hei hian free agent taka a chhuah theihna kawng a hawn dawn a ni. Hemi hnu hian United a chhuahsan tak tak ang em tih leh, a chhuak a nih chuan club khawi nge a pan ang tih chungchangah sawi a tam hle. Tunah chuan he rawlthar hi lakluh tuma beiseina sang ber dawngtu chu Real Madrid an ni a, tun kar thuchhuakah pawh January transfer window inhawng turah Spanish club lian hian inremna siampui an hnaih chho hle nia tarlan a ni.

Spanish chanchinbu 'Sport' tarlan danin, Bellingham-a'n Gabriel-a'n Madrid a zawm theih nan "mawhphurhna pawimawh tak" a lo nei tawh tih a tarlang. Real Madrid pan turin Gabriel-a rilru hmin a tum hle a, he rawlthar hi Spanish khawpui a thlen a, Madrid a zawm hunah pawh England midfielder Bellingham hi a 'mentor' (kaihruaitu) atan a awm dawn tih an sawi bawk.

Gabriel-a hian United a chhuahsan ta a nih pawhin, Jose Mourinho-a enkawl Real Madrid first team-ah nghal mai chuan a inlan hmel loh. Sport-in a tarlan zel danin, Madrid pan ta se Spanish giant-te hian first team-ah hmang nghal lovin an reserve team, Real Madrid Castilla tan an khelhtir rih a beiseiawm a ni.

Gabriel-a'n Madrid zawm a hnaih tawh hle nia tarlan ni mah se, Manchester United lam erawh chuan transfer a hnai tawh hle nia thuthang awmte chu mak an tih thu an sawi thung. Manchester club hian Madrid nena Gabriel-a transfer chungchangah inbiakna an la nei hrim hrim lo nia hriat a ni bawk.

Real Madrid hian Gabriel hi an lalut a nih chuan, United hian compensation fee (zangnadawmna) an dawng thei dawn a, mahse chu chu £100,000 aṭanga £300,000 bawr chauh a nih beisei a ni. Madrid hian Gabriel lakluh nan hian £8.5million thleng thehchhuah an inhuam nia tarlan ṭhin ni mah se, United-in an hmuh tur tak tak erawh zangnadawmna sum tlem te chauh a ni dawn tihna a ni.