Sir Alex Ferguson-a'n Manchester United manager hna a chelh aṭanga kum 40 tlinna thlen a nih takah, he Scot pa-in Old Trafford-a hlawhtlinna a thlen ropui tak hi tlin nawn leh theih a nih thu head coach Michael Carrick chuan a nemnghet.

Ferguson-a hian Old Trafford-a kum 26 a awm chhung khan nomawi 38 ngawt a la a, chung zingah chuan Premier League title 13 leh Champions League nomawi pahnih te a tel a ni. Mahse kum 2013-a club a chhuahsan hnu khan United dinhmun hi a tlakniam chhoh tak avangin, heng nomawi lian pahnih inchuh tur hian an hnaih ngai tawh lo hrim hrim a ni.

Ferguson-a United a zawm kum 40-na hi United bawhin harsatna lian tak an hmachhawn leh lai tak nen a inken tel a. Aberdeen aṭanga Fergie an lakluh ṭum khan, United hi goal difference vang chauha relegation zone pawnah awm an ni a, hei hi tun dinhmuna an dinhmun nen pawh a inang chiah a ni.

Season 13 liam ta chhung khan Ferguson-a lo hnutchhiah dinhmun sang tak tluk zel chu thil harsa tak a ni tih a lang tawh a, mahse Carrick chuan a club hmangaih em em-ah hian hetiang hlawhtlinna hi a kir leh thei tawh lo tihna a nih loh thu a sawi thung.

"Thil theih loh a ni lo," tiin Carrick chuan a sawi. "Engkim hi a theih vek a ni. Team thar i din a ngai a, a taka thil thleng thei thlir thiam a ngai bawk. Dinhmun dik tak aṭanga thil thlir thiam a ṭul a ni. Tun hnai chanchin kan neih tawhte leh kan thlen tum ber kan thlir chuan, thil hi riak meuhva thleng thut thei a ni lo.

"Hlawhtlinna hian hun a duh a, hun duh rei tak hman hi nuam kan ti em em lo nain, squad ṭha tak din tur chuan hun pawh engemaw zat a ngai ṭhin a ni. Hlawhtlinna atan kawng tawi (shortcut) a awm lo. A tawpah chuan chumi hmun chu kan thleng ngei dawn a, chuvang chuan thil theih a ni chiang mai," tiin a sawi.

Chawlhkar laia Champions League-ah winless streak vawi 9 ngawt an neih tawh titawpa inelna harsa tak kar aṭanga hnehna an chan tak avangin Carrick-a pressure zawng zawng pawh a ziaawm deuh a, heti a nih tak avang hian sawiselna leh thlithlai hnaih lutuk pawh awm lovin Ferguson-a anniversary hi United hian an hmang thei ta a ni.

Carrick chuan sawiin, "Football club a nihna angin hei hi lawm tlak tak a ni chiang mai. Inkhelh ka chawlhsan hnua tun hnaiah phei chuan player ka nih lai aia nasain a hnenah ka hnaih tawh zawk a, kan inbe zing tawh zawk bawk.

"Hun a kal zel a, inlaichinna pawh a inthlak chho ṭhin a, chu chu thil hrisel tak a ni. Helaia ka lo thlen tirh aṭang tawh khan, mimal anga ka chunga a nghawng (impact) nei tlat tu a ni a. Eng tik lai pawha min be reng a, thurawn min pe zut char char tihna zawngin a ni lo. Amaherawhchu mimal tak chuan, a thil tih dante leh nungchang ṭha aṭanga ka lo inzir chhuah kha a ni zawk.

"Chumi hnuah ṭhian ṭha takah kan inleh chho ta a, hei hi thil nuam tak a ni. Club tana a thawhhlawkna leh a la thawh zui zel tur hian awmze lian tak a nei a ni," tiin a sawi.

Kum 1990 January thlaa Nottingham Forest laka FA Cup third-round match-ah Mark Robins-a goal khung pawimawh tak vang khan Ferguson-a manager hna chu humhim a lo ni tawh a, khatih lai khan hna aṭanga ban a nih tawh ngei an rin laiin pressure a ziaawm phah a nih kha.

Roma laka an kir lehna (Houdini act) leh Robins-a goal chungchang hetianga khaikhin a nihna chu Carrick-a hian a nuihza mai a, a team-te chu he hnehna aṭanga hmalam pan zui zel turin a ngen ta zawk a ni.

"Hmalam pan pui hi kan tihtur a ni," tiin a sawi. "Hun khat atan chuan, zan ropui tak a ni a. Kan khel ṭha thlawt a, hnehna hi kan phu ngawih ngawih a ni. Hetianga hmawr kan bawk thei hi a nuam hle a, kan ṭantute tan pawh hetiang rilru put hi a duhawm em em a ni.

"Engmah kan la ti puitling lo a, eng thil hlawhtlinna lian mah kan la spak lo. Hei hi hmalam pan nana kan hman tur hun pawimawh tak pakhat a ni mai a. Mahse hetiang chet ṭhatna hi kan mamawh belh ngei a ngai a ni," tiin Carrick chuan a sawi.