Club football a rawn kir leh ta a, mahse Manchester United ṭantute tan erawh lungngaihna ngai bawk a thleng leh ta. Inrinni inkhelah khan Bryan Mbeumo-a goal hmangin Michael Carrick-a naute chuan point thum hlawhchhuak mai tur anga an lan laiin, hun tawp dawn lamah Dominic Solanke-a'n Tottenham tan a rawn sut leh hlauh a; hei hian Red Devils-te chu tun season Premier League-ah vawikhat chiah hnehna la chang rih angin a la vawng ta reng a ni.
He inkhel inhnehtawk tak aṭang hian chhui chhuah tur tam tak a awm a, United bul ṭan dan te, an hliam neih mekte leh position buaithlak ṭhenkhat Carrick-a'n a chinfel dan tur chungchangah fan-te aṭangin zawhna a lut hnem hle a ni.
Midfield-ah Baleba, Mainoo leh Fernandes te hi thlan hmasak an ni dawn em?
Carrick-a hian player zawng zawng an dam ṭhat laia a team chak ber a thlang a nih chuan, Baleba, Kobbie Mainoo leh Bruno Fernandes te pathum hi tlar laili luah tura a thlan ber an nih a rinawm a, an inkawp dan hian balance ṭha ber a nei bawk. Baleba awm loh chhung khan Mainoo hi No. 6-ah a che ṭha hle a, mahse Youri Tielemans nena an inkawp erawh a la tawk lo deuh a ni. Tottenham laka an inlan dan aṭang pawh khan Mainoo leh Tielemans te inkawp hian top-flight level-a mamawh tharum leh chakna (physicality) an la nei tawk lo tih a chiang hle. Tielemans hian game tam tak khel mah se, Baleba hian United midfield-in an mamawh ṭhin thahrui leh ṭhahnemngaihna a rawn thlen thei zawk a ni. Fernandes erawh No. 10 position-ah thlak ngaihsak lohva dah a ngai reng a, tunah pawh na nei chungin a khel mek a, chawlh hahdamna hun a neih theih hun tur a la chiang lo hle.
Pre-season lineup kha Carrick-a'n a hmang thei mai lo em ni?
Pre-season leh Premier League inkhelh boruak leh a nasat zawng (intensity) hi a inthlau em em a ni. Pre-season-ah chuan point inchuh a awm lova, chakna leh tlan ran lamah pawh Premier League a tluk lo hle. Entirnan, rawlthar Ayden Heaven chu pre-season-ah che ṭha viau mah se, Hull City leh Brighton lakah a talbuai hle a. Mason Mount nena inkawp ṭha tak Andrey Santos pawhin inelna tak takah chuan hmun chan a harsa a ti hle bawk a ni.
Baleba hi left-back-ah a khel thei ang em?
Brighton-ah khan centre-back angin vawi hnih vel a lo khel tawh a, ke veilam hmang thiam ni mah se, midfielder tura lak a nih avangin United hian tlar lailiah an mamawh ber a ni. Spurs lakah minute 30 chauh inlan mah se midfield-ah a mamawhawm zia a lang chiang hle. Patrick Dorgu leh Noussair Mazraoui te ram tana an khelh laia an inhliam tak avangin left-back position hi ngaihtuahawm deuh mah se, Diogo Dalot a awm a, emergency thilah Lisandro Martinez leh Ayden Heaven te pawh an awm bawk a, Baleba ai chuan an ni hi an hmasa zawk vek ang.
Manuel Ugarte hi engtikah nge a lo dam ang?
Tun season chhung chuan khelmual a rah leh mai a la rinawm loh. Nipui laia a khup zai a nih hnuah Carrington gym-ah inenkawl chho ṭan mah se, khelmuala inlan leh thei tura inbuatsaih nan hun a la duh rei hle dawn a ni. Tun season tawp kar hnih velah chauh a rawn inlan theih a beiseiawm chauh a ni.
Hliam vanga buaina hi engvang nge?
Vanduaina vang liau liau a ni ber. Erik ten Hag-a season hnihna laia training-a muscle injury an neih sup sup ang kha a ni lo. Benjamin Sesko-a'n a chawn ruh lamah hliam khirh tak a nei a, Ugarte-a'n World Cup-ah a khup a tina a, Dorgu leh Mazraoui te erawh ram tana an khelhnaah an inhliam thung a ni.
United hian top four an thleng thei ang em?
Tun dinhmunah chuan hrilh lawk a la harsa hle a, chona lian tak a ni. Amaherawhchu, Manchester City thubuai kal mek avangin thil a inthlak danglam thei a, point paihsak an nih chuan top four emaw top five luh beiseina a sang lehzual dawn a ni. Chelsea leh Tottenham te pawhin bul an ṭan ṭhat bik loh avangin Champions League hmun inchuhna hi a la inhawng reng a, hei hian Carrick-a pressure neih pawh a tizangkhai deuh thei a ni.
