Manchester United defender Lisandro Martinez chuan Pathianni zana Craven Cottage-a Fulham an hmachhawn ṭumin goal a inkhung palh a, hei vang hian Premier League chanchina United tana own goal khung hnem ber record duhawm lo tak chu a nihrual ta a ni.
He inkhelah hian second half-ah Martinez-a'n United goalkeeper Senne Lammens-a khawih theih lohva ball a tihlen luh palh avangin mualneitu Fulham hian hma an hruai a. Mahse, Ajax defender hlui tihsual hi tlarhma player Matheus Cunha chuan United tan goal pawimawh tak khungin an siphurh a rawn sut a, 1-1 in an inhnehtawk ta hram a ni. Martinez hi a inkhel chhe lem lo va, first half-ah phei chuan hla deuh aṭanga a shot ṭha zet chu Fulham keeper Bernd Leno chuan a lo dansak hial a ni.
Opta Analyst-in data an chhut danin, kum 2022-a Ajax aṭanga Old Trafford a pan hnuah kum 28 mi Argentina international Martinez hian Premier League-ah United tan own goal vawi thum lai a khung tling ta a ni. He record duhawm lo takah hian United player hlui, tun hnaia head coach Michael Carrick-a coaching staff zinga tel ta Jonny Evans chu a nihrual chiah a ni.
Kum 1992-a Premier League an din ṭan aṭang khan United tan Martinez leh Evans bakah hian Wes Brown, John O'Shea leh Henning Berg te chu Premier League-a own goal khung hnem ber (vawi thum ṭheuh) an ni. Martinez-a'n own goal a lo neih tawh pahnih te chu season liam ta (2025-26) khan Arsenal leh Liverpool laka a inkhung palhte kha an ni.
Kum 2022 World Cup champion Martinez hi kumin nipui hnuah pawh Carrick-a hnuaiah Old Trafford-ah chuan player pawimawh tak a la ni chhunzawm reng a. October thlaa international break neih hma hian tun season inelna hrang hrang game pasarih an khelh tawhah vawi nga a inlan tling tawh a ni. Premier League match hnuhnung pali an khelhah bul a ṭan vek bakah minute 90 a khel tluan vek bawk.
Tun season 2026-27 campaign-ah Carrick-a naute hi an la che ṭha tawk lo hle a, match nga an khelh tawhah point 5 chauh hmuin league table-ah 12-na dinhmun an luah mek a ni. Ram tana inlan tura an chawlh lailawk hnuah United hian October ni 10 khian Old Trafford-ah Tottenham mikhualin Premier League match an khel chhunzawm leh ang.
