Thawhleh zan Champions League league phase-a Old Trafford-a Manchester United leh Roma an inhmachhawn turah, team pahnih hian hliam vangin buaina an hmachhawn hle a, player pawimawh 9 ngawt an chhawr thei dawn lo a ni.
Michael Carrick-a enkawl Manchester United hi kar tawp khan Premier League-ah Chelsea 2-0 in an hneh lo a, inelna hrang hrangah match 9 a zawnin chak nei lovin an awm mek a ni. Champions League lamah pawh an match hnuhnung pahnihah Como leh Atlético Madrid te an hneh loh avangin, table-ah 20-na dinhmun thlengin an tla thla tawh a ni.
Roma an hmachhawn hmain Carrick-a tan player inliam an tam hle a, player 5 ngawt an chhawr thei dawn lo. Left-back Luke Shaw chu hliam avangin match 5 ngawt a chawl tawh a, he match-ah hian a la fit dawn loh thu Carrick-a'n a nemnghet. Carrick chuan, "Luke hi tun karah chuan a inlan thei dawn tlawhtlawh lo a ni," tiin a sawi.
England forward Marcus Rashford pawh a mal leh a kawng hliam avangin a inlan thei dawn lo bawk. Carrick chuan, "Marcus-a thil erawh chu ni tin a hmasawn dan kan thlir chho zel a ngai ang," a ti.
Left-back Patrick Dorgu chu match tana squad-ah telh ni mah se, khelmualah a inlan rih dawn lo. Squad training a rawn zawm leh ṭan thu sawiin Carrick chuan, "Group nena training a rawn neih hmasak ber ni a ni a, Pat-a a lo kir leh hi a lawmawm hle a ni. Team zinga a lo kir leh theih nan rim takin a thawk a, mahse naktuk match-ah erawh a inlan rih dawn lo a ni. Tun kar chhunga a hmasawn dan kan thlir chho zel ang," tiin a sawi. Heng bakah hian striker Benjamin Sesko leh midfielder Manuel Ugarte te pawh hun rei tak chawlh ngai hliam an neih avangin an inlan thei dawn lo bawk a ni.
Italian club Roma lam pawhin Old Trafford-a an match khelh turah hian hliam vangin player 4 an chhawr thei dawn bik lo. Roma manager Gian Piero Gasperini chuan Lorenzo Pellegrini, Paulo Dybala leh Manu Kone te chu hliam avangin an inlan thei dawn lo tih a nemnghet a. Goalkeeper Mile Svilar pawh a ke zungpui hliam aṭangin a la dam chiang loh avangin a inlan thei dawn lo bawk a ni.
