Manchester United captain Bruno Fernandes chu kum 2026 FIFPRO Men's World 11 lawmman chawi thei tur shortlist-ah koh a ni ta e.
Season liam ta khan Premier League-ah a che ṭha em em a, midang pet luh tur vawi 21 ngawt siamsakin (assist record thar siamin), Premier League Player of the Season atan thlan a nih bakah United chu pathumna a luahtipui a ni.
Mahse, tun season-ah erawh kum 32 mi he Portugal international hi a duh angin a che ṭha hleihei lova, inelna hrang hrang match 12 a khelhah goal 4 khungin assist vawikhat chauh a la nei a ni. An captain leh player pawimawh ber a chet ṭhat tawk loh avang hian Red Devils te pawh an tuar hle a, league match 9 an khelh hnuah 17-na dinhmun hial an luah mek a ni.
Hetiang hian tun season-ah harsatna tawk mek mah se, season liam ta chhunga a chet ṭhat em avangin khawvel huapa inelna lawmman ropui tak chawitu zinga mi ni tur hian chhawp chhuah a ni ta tho a ni. FIFPRO Men's World 11 hi khawvel pum aṭanga professional footballer 20,000 aia tam ten vote an pek hmanga thlan ṭhin a ni a, hmun hrang hranga player ṭha ber ber 11 thlan chhuah an ni ṭhin.
Fernandes hian a hmain PFA Players' Player of the Year, FWA Footballer of the Year leh record ni hial turin vawi nga (5) ngawt Sir Matt Busby Player of the Year lawmman te a lo chawi tawh a, tun ṭuma shortlisted a ni leh ta hi a career-a chhinchhiah tlak thil thar dang pakhat a ni leh ta a ni.
Mahse, 4-3-3 formation hmanga siam tur player 11 zinga tel ngawt hi thil awlsam a ni dawn lo. United captain hi player 26 shortlisted-ah koh tel a ni a, midfield position-ah Enzo Fernandez leh Declan Rice te nen inchuh an ngai dawn a ni. Anni bakah hian Jude Bellingham, Pedri, Rodri leh Vitinha te pawh he shortlist-ah hian an tel ve bawk. Kumin team thlan chhuah hi November ni 9, Thawhtanni hian puanzar a ni ang.
FIFPRO Men's World 11 hi kum 2005 khan ṭan a ni a, Old Trafford club aṭanga he team-a inlan thei hmasa ber chu kum 2007 khan Cristiano Ronaldo kha a ni. United hi he inelnaa representation ngah ber pakuana (9-na) club an ni a, an club aṭangin player 8 ngawtin he lawmman hi an lo chawi tawh a ni.
Ronaldo khan Old Trafford-a a awm chhungin ṭum 4 ngawt he super team-ah hian hmun a lo chang a. United captain hlui Nemanja Vidic pawh ṭum hnih (2) a lo inlan tawh bawk. Chutih laiin United player hlui dang Wayne Rooney, Rio Ferdinand, Patrice Evra, David De Gea, Angel Di Maria leh, hnai zawk lawka he lawmman latu Casemiro te pawh ṭum khat ṭheuh an lo inlan tawh bawk a ni.
Fernandes tan hian United legend te zinga a hming ziak hnan leh zualna hun ṭha a ni dawn a ni. Hemi rual hian, he Portugal midfielder contract hi tun season tawpah a tawp dawn a, kar liam ta khan head coach Michael Carrick-a tactics hman dan chungchang a sawisel zui tak avangin club-a a hmakhua pawh a chiang lo hle a. FIFPRO Men's World 11 shortlist-a a telna hian a match leh an boruak zangkhaitir nan a ṭanpui ngei a beiseiawm hle.
