Stamford Bridge-a Chelsea an hmachhawn ṭum khan Manchester United winger Amad Diallo chu ni 320 chhung zet goal khung tawh lo player ang maiin a inlan a. First half chhungin United-in goal khungna hun ṭha engemaw zat an nei a, heng zingah hian expected goals (xG) 0.56 nei pha khawpa hun ṭha hi Amad-a hnenah a thleng hnem hle a ni.
Heng an chance hmuh zingah half-time ṭan hma chiah a Amad-a chance thlahthlam tak mai kha a pawi ber a ni. Defender Wesley Fofana a bum hnuah goalkeeper nen chauh an inhmachhawn zui a, mahse he hun ṭha lutuk hi Amad-a'n goal bar chungah a pet over ta hlauh mai a ni. Hemi ṭum hian mual sira awm United head coach Michael Carrick pawh a lungawi lo hle a, a phili buai hle nghe nghe. Amad-a'n a hnung zawnga Fofana-a'n a nawr nia sawiin penalty beisei mah se, he hun ṭha a hmuh aṭang hian goal mawi tak a khung zawk tur a ni.
Chelsea laka an tlawm hnu ni khat lekah Amad hian social media-ah a thiam loh a nih zia puang chhuakin, "Hun harsa takte hian min delh rit ṭhin a, mahse min inpumkhattirtu hi engmahnin a nuaibo ngai lo ang. Chakna hlimna kan ṭawng dun leh tur hi kan nghah rei tawh em avangin a ropui lehzual ang. Rinna nghet tak ka nei," tiin Instagram-ah a ziak a ni.
Tlarhma lam inthahriat thiam loh hi Amad-a tan kumin chhunga buaina lian tak a lo ni ta reng mai a. Red Devils tana a goal khung hnuhnung ber chu December 15, 2025-a Old Trafford-a Bournemouth nena 4-4 a an inhnehtawk ṭum kha a ni a, hemi hnu hian club tan goal a la khung miah lo a ni. Season liam ta final match-ah Brighton lakah assist neiin, World Cup-ah Ivory Coast tan phur takin a inlan a, form ṭha tak a rawn hmu chho leh ṭan nia ngaih a nih laiin goal a lak khung zui thei miah lo thung.
Striker Benjamin Sesko a hliam avanga a chawlhlawk mek bawk nen, Bryan Mbeumo chauh hi goal khung thei tura rin rawl a ni rih a, hei hi United tan buaina lian tak a tling a ni. Chuvang chuan Thawhlehni zana Roma an hmachhawn hunah rawlthar Shea Lacey chu bul ṭantir ve a hun tawh hle.
Amad-a'n goal a khung zo lo zawk mai chauh a nih avanga amah inhnukdawk nghal mai chu a tawrhthlahelawm maithei a, mahse Lacey hian hun ṭha a phu ve tawh hle a ni. September thlaa Carabao Cup-a Brighton laka goal mawi tak a khung hnuah, Como leh Bournemouth lakah tlem te te chauh a inlan a. Amad-a'n club tana goal a khung lohna kum khat a tling ṭep tawh a, Lacey thung hi chu ni 47 liam ta lek khan goal a lo khung tawh thung.
Lacey hi winger huaisen, kil hrang hrang aṭanga goal zawn ngam tak a ni a. Carrick-a team-ah hian goal khung thei player an mamawh takzet a, tun dinhmunah chuan Lacey hian Amad aiin goal rawn thlen theihna hun ṭha zawk a siam mek a ni.
