Zanin Champions League inelnaa AS Roma nena an inkhelh tur chungchangah Manchester United head coach Michael Carrick chuan phur tak leh chak tak chunga inhmachhawn a inpeih thu a sawi. Heti a nih rual hian United chet ṭhat lohna hi a thui tawh hle a, September 10-a Sabah FK an hneh aṭang khan vawikhat mah an la chak leh lo a ni. He thil avang hian Carrick-a hna thawk chhunzawm zel tur dinhmun hi a derthawng hle a, tun kar chhung hian dinhmun an siamṭha a nih loh chuan a hna aṭanga a chawl a ngai hial maithei a ni.

Thawhṭanni khan Patrick Dorgu chu training-ah a rawn kir tawh a, mahse Carrick chuan zanin inkhelah erawh a inlan dawn loh thu a nemnghet a. Hemi avang hian tlarhnungah thutlukna siam a ngai dawn a ni. Sir lamah Diogo Dalot chu left-back-ah a inlan chhunzawm tawh a rinawm a, mual dinglam sir ah Leny Yoro chhawr a nih hmel bawk.

Inrinni Premier League match-a red card hmutu Lisandro Martinez chu Roma lakah hian a inlan thei dawn a, Pathiannia Aston Villa an hmachhawn turah he Argentine defender hi a hrem dawn avangin zanin inkhelah hian bul a ṭan ngei tura ngaih a ni. Fan-te tan Martinez-a'n bul a ṭan tur hi pawm harsa deuh maithei ni mah se, Carrick chuan a ruahmannaah he centre-back hi mi pawimawh tak a la ni reng tih a lantir a ni. Harry Maguire nen central defence-ah an inkawp a beiseiawm bawk.

Thawhṭannia press conference neihnaah Carrick nen midfielder rawlthar Kobbie Mainoo chu a rawn inlan a, hei hian inkhelh turah bul a ṭan dawn tih a kawk tlangpui ṭhin a ni. Mainoo leh Carlos Baleba te inkawp hi midfield rinawm leh nghet tak siamtu an nih tura ngaih a ni a, zanin inkhel hi an pahniha kawptirna hun ṭha ber a ni thei ang.

An hmaah an captain Bruno Fernandes chuan No.10 role a luah chhunzawm ang. Stamford Bridge-a an khelh ṭum khan goal leh result a thlen zo lo ni mah se, Portuguese midfielder hi a che ṭha hle a ni. Marcus Rashford hi rawn kir ṭan mek mah se he match-ah hian a la inlan thei dawn lo a, chuvang chuan mual veilamah Matheus Cunha chhawr a nih leh a rinawm. Mual dinglam sir ah Amad-a'n bul a ṭan chhunzawm a beiseiawm a, rawlthar Shea Lacey pawhin inlan a nawr viau thung.

Tlarhma lailiah Bryan Mbeumo chuan bul a ṭan ber tura ngaih a ni a, mahse Chelsea an hmachhawn ṭum ang khan tlarhma player-te inthleng kual vel hi a chakawm hle dawn a ni.

Manchester United lineup beisei (Predicted XI):

Goalkeeper: Senne Lammens

Defender: Leny Yoro, Harry Maguire, Lisandro Martinez, Diogo Dalot

Midfield: Carlos Baleba, Kobbie Mainoo

Attacking Midfield/Wing: Amad, Bruno Fernandes, Matheus Cunha

Forward: Bryan Mbeumo