Kar liam ta khan Lisandro Martinez-a'n Manchester United thuneitute a beihna khan fan-te lam aṭangin thlawpna a hmu a nih pawhin, tun ṭuma Bruno Fernandes-a'n Michael Carrick a ṭawngel erawh chuan chutiang thlawpna chu a hmu dawn lo chiang hle. Fernandes hian match zawh hnu TV interview-ah a rilru a sawichhuak a, director of football Jason Wilcox-a chungchangah fan-ten rinhlelhna nei ve deuh mah se, Carrick-a mualpho taka pholam mite hmaa hnuhhniam erawh tumahin an duh lo a ni.
United player-te'n a zawnin kar hnih chhung an manager leh hotute an bei zui chu thil mak tak a ni a. Como laka an tlawm hnuah Fernandes-a'n tlang taka Carrick-a tactics a sawisel chiam mai chu tun season-a amah leh amah inti mualphotu player dawihzep thiltih a ni. Kum 32 mi Fernandes hian Como mualah Nilaini zan khan club tana a theihna zawng zawng hlantu head coach laka pressure belhchhah lovin, darthlalangah inenin amah leh amah a inbihchian a ngai zawk a ni.
Tun season chhungin Fernandes-a khelh dan a hniam hle a, Como mualah phei chuan a nungchang a mawi lo kher mai. Inkhelh ṭan tir aṭangin a team-mate te a khak nghal char char a, lungawi loh lutukin a ban a vai kual vel a, a jersey number rawn tarlana lakchhuah a nih lai phei chuan bench lam chu rum takin a melh ngur bawk. Carrick-a'n khelmual aṭanga a la chhuak nghal kha thutlukna dik tak a ni.
Press conference-ah Carrick chuan Fernandes-a sawiselna chu ngawi renga tuar mai lovin a chhang let sak hle a. Fernandes-a press dan phung hi a phili kual vel mai mai laiin, team pressing dan a han sawisel vel chu thil nuihzatthlak tak a ni. Carrick chuan, "Second half-ah khan man-to-man-in chanve vel chauhvin kan press a, chumi aṭang chuan goal kan chhuah ta a ni. Eng system emaw tactics pawh hmang mah la, i tlan peih lo a, hmalam leh hnunglama i tlan peih loh chuan i chak ngai lo ang," tiin a player-te leh Fernandes chu a ṭawngel let ve siah mai a ni.
Cesc Fabregas-a enkawl Como kha Carrick-a United aiin zirtir an nih dan a ṭha zawk tih chu tute pawhin an hmu thiam vek ang. Mahse, mipui hriata captain-in a coach a bei chiam mai chu nungchang ṭha lo leh zahthlak tak a ni. January thlaa Carrick a lo luh tirh khan Fernandes-a theihna a chawisang hle a, Premier League match 17 hnuhnungah Fernandes hian goal 4 khungin assist 13 a nei hial a nih kha. Carrick-a'n tlarhnung lama a khelh ṭhinna aṭanga la chhuakin a duhsak hle a, United pawh Champions League-ah a kailuhpui bawk a ni.
Dressing room-a hruaitu ber Manchester United captain aṭang chuan hetiang thil hi beisei a ni lova, mualpho thlak tak a ni. Fernandes chauh ni lovin, player dangte pawh Carrick chuan a khak nual a, Matheus Cunha pawh half-time hmaa a nungchang chhiat vangin a zilh tawh bawk. Old Trafford-a thla 10 a awm chhungin Carrick hian a player-te chu humhim zelin, hneh loh nihna zawng zawng pawh amah ngeiin a pu mai ṭhin a, mahse player-te'n an rulhlet dan erawh a lungchhiatthlak hle a ni. Kum 45 mi Carrick hian club a chhuahsan a hun hnai tawh mai thei a, Fernandes hian kum sarih chhungin manager pariatna a hmachhawn a ngai mai thei bawk; mahse a hmaah chuan ngaihdam a dil a ngai takzet a ni.
