Wednesday zan Champions League inkhelah Manchester United chuan Giuseppe Sinigaglia Stadium-ah Italian club Como chu an tum a, 4-1 zetin an tlawm. He hnehlohna hi Michael Carrick-a hnuaia United tlawm nasat ber a ni a, kum 1994-a Barcelona laka an tlawm hnuah Europe inelnaa an chak loh nasat ber ṭum a ni bawk. Old Trafford club tan chuan tun dinhmun hi a duhawm lo hle a ni.

United-in Champions League nomawi an chawi hnuhnung ber ṭum khan Italian club Como hi Italy-a fifth-tier (division ngana)-ah an lo la khel ṭhin a. Mahse, tunah chuan manager Cesc Fabregas-a kaihhruaina hnuaiah club hmasawn tak an ni ta tih an pholang. Match chhungin Fabregas-a naute an inrerem ṭha em em a, tlar hnung lam pawh Nico Paz-a'n a tihel kual vel mai mai a ni.

Giuseppe Sinigaglia Stadium-ah hian United hi an inphatmar hleithei lova, inelna tak tak pawh an lantir thei lo a ni. Como-in 4-0 a hma an hruai meuh chuan United tan beiseina a awm tawh lo hrim hrim. Mahse, he inkhelah hian chanchin langsar ber pakhat chu Como manager Fabregas-a'n match tawp lam minute 10 chhunga a thil tih avanga inchhirna a neih thu a sawi hi a ni. Fabregas chuan match tawp lam minute 10 chhungin inkhelh muangtir tur leh tha jimin tlan tawh lo turin a player-te a hrilh thu a sawi chhuak a ni.

Fabregas chuan, "Minute 10 hnuhnung bera kan chet danah khan ka inchhir hle a ni, a chhan chu game dang khelh tur kan neih bakah 4-0 a hma kan hruai tak avang khan keimah ngei hian inkhelh tempo muangtir turin team ka hrilh vang a ni," tiin chanchinbumite a hrilh.

A sawi zelnaah, "Player-te hnenah tlan tawh lova laili-a awm hle hle turin ka hrilh a, hei hi ka inchhir zui em em a ni. A chhan chu keimah ngei hi tawp thlenga ṭang tur leh bepui dawh tura anmahni tur ṭhintu ka ni si a. An goal khung khan ka thin a tiur hle a, a chhan chu kan thawhrimna leh venhimna (defensive block) kan thlahdul vang a ni, mahse he thil hi keima tihsual a ni," tiin a sawi.

Fabregas-a'n tlan tawh lo tura a player-te a hrilh hnu pawha United-in goal khat chiah an khung thei hi Carrick-a team tan chuan zahthlak tak a ni. Stoppage time minute khatnaah Joshua Zirkzee chuan goal mawi tak rawn khung bawk mah se, United tan chuan chhan chhuahna a ni zo tawh lo. Premier League lamah pawh beiseina sang tak nen an thlir zui hlawm a, Pathianni hian United hian Bournemouth an hmachhawn leh dawn a ni.