Giuseppe Sinigaglia Stadium-ah Como chuan Manchester United chu 4-1 ngawtin an sawp a. He Champions League inkhela an mualpho hnu hian, United tana treble lo la tawhtu goalkeeper ropui kum 62 mi Peter Schmeichel chuan Michael Carrick-a thutlukna siam leh player pahnih—hliam aṭanga rawn kir Matthijs de Ligt leh defender Noussair Mazraoui te chet dan chu a hriatthiam theih loh thu a sawi chhuak a ni.

Netherlands international kum 27 mi De Ligt hian hnungzang hliam na tak a neih avangin hun rei tak chhung khelmual a chhuahsan a, manager hlui Ruben Amorim-a enkawlna hnuaia 2025-26 season chawhnu lam zawng kha a khel thei lo a nih kha. Nipui lai khan a hnungzang hi an zai a, thla eng emaw zat chhung inenkawlna a neih hnuah khelmualah rawn kir lehin, Champions League-a Atlético Madrid laka 2-0 a an tlawm ṭum leh Premier League-a Leeds United nen 1-1 a an inhnehtawk ṭum khan bench-ah a lo ṭhu tawh a ni.

Mahse Nilaini zana Como an hmachhawn ṭum khan, head coach Michael Carrick chuan De Ligt hi bul a ṭantir nghal ta thut a, hei hi Carrick-a hnuaia a vawikhat inlan na chiah a ni bawk. Match fitness a neih tawk loh zia khelmualah a lang chhuak nghal hle a ni.

CBS Sports-a he inkhel chungchang an thlirhonaah Schmeichel chuan De Ligt bul ṭantir chu thutlukna dik a nih loh zia tarlangin: "Champions League-a kan luh leh avanga he programme-a ka hlim zia kha theihnghilh suh u. He team zinkawng thlir hi ka chak em em ṭhin a ni. Mahse vawiinah chuan centre-half-ah De Ligt kan luhtir a, season liam ta November aṭang khan minute khat pawh a la khel miah lo a ni. Leeds lakah pawh a vawi hnih nan bench-ah a ṭhu chauh a, United tan hian training pawh engzat chiah nge a neih pui hman ka hre lo va, a khelh danah pawh a lang reng a ni," tiin a sawi.

De Ligt bakah kum 28 mi fullback Noussair Mazraoui chet dan pawh Schmeichel chuan a sawisel zui bawk a. Carrick-a'n Mazraoui a chhawr dan tactics chu zawhna zawtin, Como laka a tihsual lian tak chu a kawk chhuak bawk a ni.

Schmeichel chuan sawi zawmin, "Mazraoui saw a tirah left-back-ah an dah a, a kal fuh lo tih a chiang reng mai. Tichuan right-back lamah an sawn phei leh a, Micah Richards-a'n goal hnihna an chhuah laia a tihsual a lo sawi kha a dik chiah a ni. A awmna hmun tur thlan dik loh (positioning) leh a thil tih zawng zawng kha a ṭha tawk lo hrim hrim. Hetiang siamṭha tur hian hun engzat nge an mamawh dawn a, eng nge an tih dawn tih pawh ka hre lo, mahse a tawk lo takzet a ni," a ti bawk.

Tun season Champions League-ah Carrick-a naute hian match thum an khelh tawhah vawi hnih ngawt tlawm hmel an hmu tawh a, vawi khat chiah hnehna an la chang a ni. Red Devils hian September thla khan Old Trafford-ah Sabah chu 4-0 a an sawp ṭum chiah khan hnehna an chang a, tunah erawh an dinhmun a derthawng chho hle a ni.