Champions League inkhelah Manchester United chuan Italian club Como chu 4-1 ngawtin an hneh lo a, he tlawmna rapthlak tak hian Old Trafford club hotute chu zahna nasa tak a thlen a ni. Kumin nipui bazar hma zawnga an sum lakluh (revenue) leh player hlawh (wage bill) pek chhuah zat en chuan, United leh Como inkarah hian pound maktaduai 823 (£823m) zet inthlauhna a awm a; mahse khelmual chhungah erawh Michael Carrick-a naute hian sum tamna chu engmah lo mai a nih zia an lantir thung.
Inkhel ṭan aṭanga minute hnih chauh a liam tihin Nico Paz chuan mawi lutukin Como tan hma a hruaipui nghal a. Hemi hnu hian Anastasios Douvikas, Jacobo Ramon leh Paz bawk chuan goal dang an thun belh leh a, hun tawp dawn lama Joshua Zirkzee-a goal khung ve chu hnemhnanpuina tham pawh a tling lo. United hian khelmualah thawhrim leh inpekna lamah an tumpuite an tluk lo chiang hle a, tlan tam zawng leh thapui thawh kawngah pawh Como chu an chungnung zawk chiang em em a ni.
Khawvel huapa hmingthan leh sum khawhral theih kawngah club pahnihte hi inthlau tak an ni. Football finance expert Kieran Maguire-a'n a tarlan danin, Como hian season hmasa khan sum lakluh £41m chauh an neih laiin, United erawh chuan £678m lai sum an lalut thung. Player hlawh pek chhuah kawngah pawh Serie A club hian £72m chauh an hman laiin, United chuan £302m ngawt an lo hmang tawh a ni. Mahse chutiang sum inthlauhna zawng zawng chu minute 90 chhungin Como hian an thai bo a, hnehna phu zawk an nih zia an lantir thak a ni.
Match zawhah United head coach Michael Carrick chuan stadium chhung aṭanga chhuak nghal mai lo United supporters-te hnenah ngaihdam a dil a. Carrick hian an team taktik hman chungchanga an captain Bruno Fernandes-a ngaihdan sawi chu chhang letin, press conference-ah a rilru a phawrhchhuak nghal bawk.
Carrick chuan, "Kan chak thei a, kan tlawm thei bawk; mahse zanina kan khelh dan phung kha chu, mi zawng zawng ka ti vek kher lo na a, kawng ṭhenkhatah chuan pawmzam mai chi a ni lo. Fans-te rilru nat dan tur hi ka hriatthiampui takzet a ni," tiin a sawi.
Carrick chuan sawi zawmin, "Goal kan chhuah vang ngawt kha a ni lo. Khelmuala kan khelh dan phung leh kan thiltih dan mawlh kha ka tan en a hrehawm ber chu a ni. Second half-ah khan man-to-man in nawr kan tum ve a, mahse chumi hnu lawkah goal kan chhuah zui leh a. Taktik leh system engpawh hmang mah la, i tlan peih lohva, hmalam leh hnunglama i tlan zung zung peih loh chuan i chak ngai lo ang," tiin a sawi zui bawk.
United hian inelna hrang hrangah match sarih (7) zawn hnehna an la chang zo miah lo a, Atletico Madrid leh Brighton laka an tlawm bakah Fulham, Tottenham leh Leeds United te nen 1-1 in an lo inhnehtawk tawh bawk a ni. Tun kar tawpah hian Michael Carrick-a naute hian mahni mual Old Trafford-ah Bournemouth an mikhual dawn a, match riat chhunga a vawikhat nan hnehna chan tumin theihna zawng zawng an thehchhuah a ngai tawh dawn a ni.
