Manchester United midfielder hlui Owen Hargreaves chuan Sir Alex Ferguson-a chu United manager la ni se, Bruno Fernandes chuan an club tan hian match khat mah a khel leh tawh ngai lo vang tiin a sawi chhuak.
Como laka Champions League match-a an tlawm hnuah Fernandes-a thusawi chuan Ferguson-a hnuaiah chuan a tuartir viau a rinawm thu he English midfielder hlui hian a sawi a ni. Hargreaves chuan hetiang thil hi Ferguson-a hun lai kha chu nise a nghawng tur a nat em avangin Portuguese star hian a sawi ngam miah lo vang hial a ti bawk.
Como laka an tlawm hnu hian Fernandes chuan Carrick-a tactics hman dan chu a lo sawisel deuh a, mahse hetianga a ṭawngchhuah avang hian hrem a tawk dawn lo nia hriat a ni. Portugal international hi club captain a la ni chhunzawm zel a, Pathiannia Old Trafford-a Bournemouth an mikhual hunah pawh United tan bul a ṭan ngei a rinawm bawk.
TNT Sports-a a inlan tumin Hargreaves chuan player a nih lai khan hetiang dinhmunah hian tu lakah nge a thinrim ang tih an zawt a, ani chuan: "A dik tak chuan manager lam hi ka kawk ngai lo hrim hrim ang. A hmasaberah chuan, Sir Alex-a hnuaiah kha chuan hetiang ṭawngkam hi i chhakchhuak ngai lo vang, a chhan chu he football club tan hian i khel leh tawh ngai dawn loh vang a ni. A pahnihnaah chuan, nangmah leh nangmah i inbihchian hmasak a ngai a ni. Man United fan pakhat mahin Manchester United hi Premier League-ah champion thei turin an beisei lo, pakhat mahin an beisei lo. Mahse i tih theih ṭha ber chu, khelmuala i penchhuah apiangin match tinah i theihna zawng zawng thehchhuah a ni mai," tiin a sawi.
Nilaini zan khan broadcasters hnenah Fernandes chuan: "Man-to-man a press loh a, a changa an hnung lama hmunawl siamsak a ball laksak tum kha coaching staff-te thutlukna a ni," tiin a lo sawi a. Carrick-a'n tactics a hmang sual em tih an zawhna chu chhangin, "Chu zawng manager leh staff-te hmuh chhuah tur a ni a, keima tih tur a ni lo," a ti a nih kha.
Hetianga an captain ṭawngchhuahna hian squad chhungah inṭhenna a thlen thei em tih Zirtawpnia pre-match press conference-ah zawh a nihin, head coach Michael Carrick chuan: "Ka tan chuan a pawimawh ber chu team hi a ni a, a hmasaberah squad leh squad chhunga kan inlaichinna hi a ni. Club tana ṭha ber tur thil a ni a, he football club tana ṭha ber tur chu ka ti zel ang," a ti.
Dressing room chungchang an zawh belhnaah Carrick chuan lungawi lohna leh inṭhenna a awm loh thu sawiin: "Inṭhenna a awm lo hrim hrim, chutiang a awm lo. Kan thil tihṭhat ṭhin kha kan tih chhunzawm leh vat a ngai a, kan ti bawk ang," tiin a chhang.
Fernandes-a lakah hian captaincy hlihsak a nih dawn em tih zawhna chu Carrick chuan: "Dinhmun chu eng pawh nise, club tana ṭha ber tur chu ka ti reng dawn tih hi ka sawi theih chu a ni mai," tiin a tlip a. United head coach hian Fernandes nen an inbe tawh em tih erawh nemnghet duh lovin: "Ka be tawh emaw ka la be lo emaw pawh nise, tun hi chipchiar taka sawina hun a niin ka hre lo," a ti bawk.
